Віктар Чайчыц сыходзіць з пасады кіраўніка Беларускай рэспубліканскай калегіі адвакатаў
Віктар Чайчыц пакідае пасаду кіраўніка Беларускай рэспубліканскай калегіі адвакатаў (БРКА). Хадзілі чуткі, што кіраўнік БРКА не прайшоў пераатэстацыю. «Гэта поўны фэйк, таму што ніякай атэстацыі ў мяне не было», — сказаў Zerkalo.io Чайчыц.
14.02.2022 / 12:25
Фота: council.gov.ru
У тэлеграм-канале БРКА з'явіўся зварот Чайчыца.
— Сёння мой апошні працоўны дзень у якасці старшыні Беларускай рэспубліканскай калегіі адвакатаў. Улічваючы, што гэтая навіна выклікае пэўную цікавасць у некаторых людзей (з самай раніцы мне паступіла мноства званкоў па гэтым пытанні), паведамляю: ніякай пазачарговай атэстацыі я не праходзіў і ліцэнзіі на занятак адвакацкай дзейнасцю мяне ніхто не пазбаўляў. Я па-ранейшаму застаюся адвакатам Мінскай абласной калегіі. Ніякіх цяжкасцяў я не баюся. Перакананы, што, нават не з'яўляючыся старшынёй БРКА, займаючыся іншымі справамі, змагу і далей быць карысным краіне і людзям. Прашу не рабіць здагадак, не спрабаваць шукаць прычыны майго сыходу і ўжо тым больш не чакаць, што я пачну гаварыць у негатыўным ключы аб калегах або дзяржаве, — напісаў кіраўнік БРКА.
Адвакат і член Савета Рэспублікі Віктар Чайчыц узначальваў БРКА з 2011 года, перад выбарамі прэзідэнта ў 2020 годзе заклікаў адвакатаў устрымацца ад заяў аб тым, што «дрэнна працуе ўся сістэма і не паддавацца на правакацыі».
— Магчыма, некаторыя адвакаты маюць намер пакінуць адвакатуру, таму дазваляюць сабе паводзіць сябе непрафесійна, не задумваючыся аб тым, што іх учынкі негатыўна адаб'юцца на іміджы калег і адвакатуры ў цэлым, — перасцерагаў кіраўнік БРКА.
У сакавіку 2021 года ён прасіў калегаў «не лезці ў палітыку». «Калі хочаце займацца палітыкай, сыдзіце і займайцеся асобна ад адвакатуры», — выказваўся Чайчыц. У лістападзе мінулага года ў інтэрв'ю дзяржвыданню ён прызнаваў, што арганізацыя робіць «усё магчымае, каб перавыхаваць аблудных».