Каля беларускай амбасады ў Рыме нешта выбухнула. Італьянцы кажуць пра петарду, беларусы пра «тэракт»
Італьянскія медыя паведамляюць, што каля беларускай амбасады ў Рыме падарвалі простую петарду, але МЗС Беларусі настойвае на версіі «тэракту», піша Радыё Свабода.
09.03.2022 / 19:25
На месцы здарэння.
Як пішуць мясцовыя журналісты з газеты Correra della sera, інцыдэнт адбыўся ў аўторак увечары. Паведамляецца, што выбух не зрабіў ніякай шкоды будынку і не нанёс ніякіх траўмаў супрацоўнікам дыпламатычнага прадстаўніцтва Беларусі.
Але МЗС Беларусі сцвярджае, што выбух адной з прылад адбыўся ў непасрэднай блізкасці ад газавай трубы і гэта ўяўляла «непасрэдную небяспеку ўсяму будынку і можна казаць пра адпаведныя мэты зламыснікаў». Паводле беларускага боку, адзін з прадметаў не здэтанаваў.
Паводле заявы МЗС, выбухам былі
«выбітыя вокны ў консульскім памяшканні, дэфармаваная металічная лаўка, якую выбуховай хваляй перакінула праз 1,5-метровую ўнутраную агароджу і адкінула на 5-7 мэтраў у бок, металічная шафа для захоўвання рэчаў для асоб, якія прыбываюць на консульскі прыём, асобныя бетонныя пліты і г. д».
У заяве таксама гаворыцца: «Супрацоўнікамі праваахоўных органаў Італіі, якія прыбылі на месца, здарэнне папярэдне кваліфікавана як тэрарыстычны акт».