Jak pavodzić siabie z siłavikami pry zatrymańni i na dopycie? Tłumačyć bajpołaviec
Alaksandr Azaraŭ — siłavik z 20-hadovym stažam, jaki siońnia kiruje ab’jadnańniem siłavikoŭ ByPol. U intervju «Tok» jon raskazvaje pra mietady pracy biełaruskich siłavikoŭ.
11.03.2022 / 13:28
Alaksandr Azaraŭ, kiraŭnik ab’iadnańnia siłavikoŭ ByPol.
Nastassia Roŭda: Možacie raskazać pra mietady pracy biełaruskich siłavikoŭ? Napeŭna ž, šantaž, zapužvańnie, katavańni — heta nie praktyka, jakaja zjaviłasia ŭ 2020 hodzie. Napeŭna ž, heta było i raniej, moža być, nie tak masava, ale było.
Alaksandr Azaraŭ: Hod ad hodu styl pracy źmianiaŭsia. Ale
ciapier im dazvolena rabić usio što zaŭhodna, i jany viarnulisia ŭ 1990-ja. Jany pačali bić ludziej, nie saromiejučysia i nie chavajučysia. Navat hetym vychvalajucca adzin pierad adnym.
Kali ŭziać toj ža HUBAZiK, nie treba dumać, što kali jany da ciabie pryjšli, značyć u ich tam užo tamy dokazaŭ tvajoj złačynnaj dziejnaści. Razumnyja pazvalnialisia, zastałasia moładź, jakuju jany nabrali z učastkovych i jakaja zusim nie razumieje, jak pracavać, albo zastalisia tyja, kamu niama kudy iści. U ich prosta jość śpisy ludziej, jakija znachodziacca ŭ bazie «Biesparadki», i jany ich adpracoŭvajuć. Jany biaruć śpis: «Davajcie na hetym tydni zojmiemsia voś hetymi 26 ludźmi», — i pravodziać pieratrusy ŭ hetych ludziej.
U ich niama nijakich dokazaŭ naohuł, što ludzi niešta robiać. Jany biaruć śpiecnaz, jaki-niebudź SAChR, nadziavajuć dla zastrašvańnia šlemy, sa zbrojaj ułomvajucca ŭ kvateru da čałavieka. A sankcyju na vobšuk atrymać lohka — adnu kryminalnuju spravu rasśledavać pa masavych biesparadkach, pa jakoj u Minsku prachodzić užo nie adna sotnia ludziej. Jany prosta pišuć rapart: «Nam viadoma, što Ivanoŭ datyčny da pratesnaj dziejnaści, treba ŭ jaho pravieści pieratrus». Ich zadača — napałochać i vymusić čałavieka pryznacca ŭ čym-niebudź, niama roźnicy, u čym.
Dyk voś, jany jaho pryciahnuć u addzieł, pačynajuć jaho muryžyć: «Daj parol ad telefona, nie dasi — pasadzim, dasi — vypuścim». Padmanvajuć.
Nielha vieryć anivodnamu ich słovu, nielha davać nijakija paroli ad telefona, nielha ni ŭ čym pryznavacca. Kali ty pryznaŭsia, dyk siadzieš 100%. Jany ciabie nie vypuściać, jak abiacajuć.
Kali ty nie pryznaŭsia ni ŭ čym, dyk vialikaja vierahodnaść, što ciabie pakatujuć i vypuściać. I ŭsio — ty volny, i ciabie nie pryciahnuć da adkaznaści. Ich zadača — zmusić čałavieka ŭ čym-niebudź pryznacca, jany navat sami nie ŭjaŭlajuć, u čym jon pryznajecca, ale buduć kazać, što ŭsio viedajuć: «Pišy jaŭku z pavinnaj, voś my ciabie bačyli na mitynhu, davaj raspaviadaj». I čałaviek, bajučysia, pryznajecca, spadziejučysia atrymać mienšuju adkaznaść. Ale jamu, adpaviedna, nijaki štraf nie dajuć, mohuć raspačać kryminalnuju spravu albo pasadzić na sutki, kali ŭsio ž budzie administracyjnaja sprava, ale heta dziakujučy tamu, što čałaviek sam pryznaŭsia.
I tyja ž pakajannyja videa: ludzi zapisvajucca, ale jak im nie soramna naohuł takoje zapisvać pra siabie, što jany nie mieli racyi. Jany paśla ŭciakajuć i raspaviadajuć, što ich tam prymusili. Nakolki ja viedaju, ciapier prosta kažaš «HUBAZiK» — i čałaviek pałochajecca i sam zapisvaje siabie na videa, i ŭsio raspaviadaje, i jaho navat nie treba bić.
Nie treba ich bajacca.
«NN»: Prosta ŭ suviazi z tym, što nivodny siłavik nie byŭ pakarany, prynamsi publična, i im dadzienyja ŭsie mahčymaści katavać, ludzi realna bajacca za svajo fizičnaje zdaroŭje. Tamu što ty možaš vyjści invalidam adtul, ty budzieš sa złamanym zdaroŭjem, psichikaj…
AA: Heta zrazumieła, kaniečnie, bajacca, ale treba razumieć — pryznańnie roŭnaje pryciahnieńniu ciabie da adkaznaści. Kali ty nie pryznaŭsia, u ciabie jość šaniec vyjści na svabodu. Pryznaješsia — šancaŭ niama. Usio. Ty sam siabie pasadziŭ u turmu.