Siensacyi Lihi čempijonaŭ: «Bavaryja» sastupaje «Viljareału» i pakidaje turnir, «Reał» ratujecca na 80-j chvilinie i ŭ dadatkovy čas bje «Čełsi»!
Noč na sieradu stała ispanskim časam u čverćfinale samaha prestyžnaha turnira dla jeŭrapiejskich kłubaŭ. Madrydski hrand «hareŭ» z roźnicaj u try miačy, adnak zdoleŭ pieravieści hulniu ŭ oviertajm, dzie skaryŭ «Čełsi». A čempijon Hiermanii vylecieŭ z rozyhryšu, puściŭšy adziny ŭdar u stvor za hulniu!
13.04.2022 / 02:30
Łuka Modryč suciašaje Chakima Ziješa. Fota: Uefa.com
Nievierahodna, ale fakt: nastaŭnik «Reała» Karła Ančałoci staŭ pieršym trenieram, što čatyry dziesiacihoddzi zapar patraplaŭ u paŭfinał Lihi čempijonaŭ.
Sioleta apynucca tam padavałasia spravaj prostaj, bo tydzień tamu jahonyja padnačalenyja pieramahli «Čełsi» 3:1. Doma zastavałasia prosta zachavać pieravahu dy pieraadoleć zapavietny barjer.
Adnak Maunt, Rudzihier dy Viernier na «Sanćiaha Biernabiea» pierakulili situacyju z noh na hałavu. Try trapnyja streły zrabili anhličan haspadarami stanovišča dy spravakavali šerah sardečnych prystupaŭ u ispanskich fanaŭ.
Trapny streł Cima Vierniera. Fota: Uefa.com
«Reał» vyratavaŭ Radryha, jaki za 10 chvilin da zakančeńnia asnoŭnaha času skarystaŭsia pasam-cudam ad Modryča dy pieravioŭ matč u oviertajm. Tam ža pieramožny dla Madryda hoł aformiŭ Karym Bienziema.
Jak vynik, «Reał» dziaviaty raz za historyju vybiŭ z rozyhryšu paŭnamocnaha vaładara trafieja.
«Čełsi» ž moža kryŭdavać nie tolki na los, ale i na bryhadu arbitraŭ, jakaja pa chodu hulni admianiła trapny streł Markasa Ałonsa.
Robiert Levandoŭski nie zdoleŭ uratavać «Bavaryju». Fota: Uefa.com
Spyniła baraćbu za trafiej i miunchienskaja «Bavaryja». Kamanda Jułijana Nahielsmana zdoleła adznačycca chutkim miačom, dziakujučy vysiłkam Robierta Levandoŭskaha.
Adnak na 88-j chvilinie trapny streł Čukvuezie adnaviŭ raŭnavahu. Pakolki ž sustreča ŭ Ispanii skončyłasia pieravahaj «Viljareała» 1:0, u paŭfinał patrapiŭ kłub z horada ŭ 50 tysiač čałaviek.
Adznačym, što za sumarnyja 180 chvilin supraćstajańnia kamanda Unai Emiery tolki dvojčy prabiła ŭ stvor supiernikaŭ. I abodva hetyja ŭdary akazalisia halavymi. Tady jak sam nastaŭnik upieršyniu ŭ karjery patrapiŭ u paŭfinał Lihi čempijonaŭ.
Dadamo, što ŭ 1/2 turnira «Viljareał» zhulaje suprać pieramožcy pary «Livierpul» — «Bienfika», a «Reał» pazmahajecca suprać macniejšaha ŭ tandemie «Mančester Sici» — «Atletyka».