Padtrymlivaŭ pratesty, vyvoziŭ brazilca z-pad abstrełaŭ va Ukrainie, chejciŭ karanavirus. Što za biełaruski futbalist jedzie hulać u Francyju?
Futbalist Mikałaj Zołataŭ — ciapier adziny biełarus, što hulaje ŭ topavych lihach Zachodniaj Jeŭropy. Abaronca pierajšoŭ u francuzski kłub «Bastyja». «NN» raspaviadaje pra hulca nacyjanalnaj zbornaj, što nie vieryŭ u karanavirus, padtrymlivaŭ ukraincaŭ u vajnie suprać Rasii dy asudžaŭ hvałt siłavikoŭ u 2020-m.
14.04.2022 / 20:19
Mikałaj Zołataŭ: «Nie było žadańnia prosta siadzieć na łaŭcy, atrymlivać zarpłatu dy kajfavać, što ja hulec premjer-lihi». Fota: FK «Dniepr-1»
Samy statusny lehijanier 2020-ch
Chaj sabie «Bastyja» vystupaje ŭ druhim pa značnaści dyvizijonie francuzskaha pieršynstva, Mikałaj, dałučyŭšysia da kłuba, pieratvaryŭsia ŭ najbolš upłyvovaha futbolnaha lehijaniera sučasnaści. Da topavych pieršynstvaŭ Jeŭropy akramia Francyi taksama zvyčajna dałučajuć Hiermaniju, Anhłiju, Itałiju dy Ispaniju. Siońnia nikoha z biełarusaŭ, akramia Zołatava, tam niama.
Jak śled, za abaroncam cikava budzie sačyć nie tolki z pazicyi ratavalnika karsikancaŭ (zaraz jany zajmajuć 14 miesca z 20 mahčymych), ale i jak ambasadara našaj krainy ŭ adnym z lepšych čempijanataŭ Staroha Śvietu.
Pieršy čałaviek, za jakoha «Viciebsk» zapłaciŭ
Zołataŭ naradziŭsia ŭ Viciebsku i mienavita tam pačynaŭ hulać u futboł. Adnak kali sprava dajšła da padpisańnia pieršaha prafiesijnaha kantrakta, rodnamu kłubu nie padyšoŭ. Jak, darečy, i takomu ž ścipłamu FK «Naftan». Paśla hetaha abaronca ŭsurjoz dumaŭ sa sportam zaviazać. Ale salihorski «Šachcior» daŭ apošni šaniec spartśmienu.
Toj za mahčymaść učapiŭsia — i ŭžo praz niekalki hod hulaŭ u vyšejšaj lizie. Darečy, u šychtach «Viciebska»: toj śpiecyjalna vydatkavaŭ 2,5 tysiačy dalaraŭ, kab viarnuć vychavanca na poŭnač krainy.
«Paśla dyrektar kłuba ŭzhadvaŭ, što ja staŭ pieršym hulcom u historyi «Viciebska», za jakoha kłub płaciŭ hrošy», — uzhadvaŭ Mikałaj.
Prapanoŭvaŭ fanam BATE «adsmaktać»
U 2018 hodzie «Viciebsk» na «Barysaŭ-Arenie» zdoleŭ zdabyć ničyju ŭ zmahańni z hiehiemonam ajčynnaha pieršynstva. Adnak likam 1:1 Zołataŭ byŭ nie vielmi zadavoleny, bo jaho kłub mieŭ realnyja šancy pieramahčy čempijona: BATE adnaviŭ raŭnavahu na 89-j chvilinie z nieadnaznačnaha pienalci.
Adnak jašče bolš Mikałaja rasčaravali pavodziny chatnich fanaŭ.
«Asobnaje pryvitańnie barysaŭskim zaŭziataram. Što vy tam kryčali padčas hulni??? Adsmakčycie? Dyk voś. Zrabicie heta sami», — pakinuŭ futbalist dopis u instahramie paśla hulni.
Z ciaham času post, kaniečnie, byŭ vydaleny. Adnak keš Google, jak i fany BATE, toje dobra zapomnili.
Abstaviŭ Bejła, debiutavaŭšy za zbornuju
U 2019 hodzie abaroncu vyklikali ŭ stan hałoŭnaj kamandy krainy na tavaryski matč suprać Uelsa. U Kardzifie Zołatavu daviałosia zmahacca z hałoŭnaj zorkaj supiernikaŭ, Haretam Bejłam z madrydskaha «Reału». Mikałaj vystupiŭ hodna, bo nie daŭ supierzornamu supierniku realnych mahčymaściaŭ adznačycca ci ŭskładnić biełarusam žyćcio.
Praŭda, zanadta starannyja dziejańni ledźvie nie pryviali da vydaleńnia Zołatava, adnak arbitr paškadavaŭ hulca — dy za foł suprać Bejła daŭ tolki žoŭtuju kartku. Darečy, paśla matča nastaŭnik valijcaŭ Rajan Hihz aburaŭsia, što biełarusu daravali žorstki foł. Adnak heta nie pieraškodziła viciebčuku atrymać praz miesiac kantraktnuju prapanovu z Rasii, ad kłuba vyšejšaha dyvizijona «Urała».
Pastaviŭ futboł vyšej za hrošy
U Jekaciarynburhu biełarus zatrymaŭsia na dva hady. I kali napačatku mieŭ šmat praktyki, to paśla nie zaŭsiody navat u rezierv traplaŭ. Vialikaja kolkaść biełaruskich futbalistaŭ u anałahičnych akaličnaściach nie prymali anijakich dzieńniaŭ, bo byli zadavoleny vielizarnymi — u paraŭnańni z Biełarussiu — zarobkami.
Adnak Zołataŭ sam zaprasiŭ transfier dy pierabraŭsia ŭ kudy bolš ścipły ŭkrainski «Kołas». «Nie było žadańnia prosta siadzieć na łaŭcy, atrymlivać zarpłatu dy kajfavać, što ja hulec premjer-lihi», — tłumačyŭ svoj manieŭr spartśmien.
Kryŭdavaŭ na fanaŭ, adnak pryznavaŭ nizki ŭzrovień zbornaj
U kastryčniku 2020 hoda Zołataŭ daŭ rezanansnaje intervju, dzie vykazaŭ kryŭdu ŭ bok zaŭziataraŭ. Maŭlaŭ, hulcy nacyjanalnaj kamandy — heta takija kazły adpuščeńnia, jakich nichto nie lubić i ŭsie tolki krytykujuć. Pry hetym paabiacaŭ, što z ciaham času futbalisty pasprabujuć vypravić situacyju dy ŭlubić u siabie suajčyńnikaŭ.
Padajecca, što słova sa spravami budzie razychodzicca jašče doŭha, bo ŭžo praz dva miesiacy paśla parazy 1:5 ad Uelsa sam Mikałaj pryznaŭsia: «Heta hańba, kaniešnie. Treba kožnamu z nas imknucca hulać u futboł, rabić heta z dušoj, sercam, kali ŭžo kłasu ŭ nas niama anijakaha. Heta naš uzrovień taki…»
Ličyŭ, što karanavirus raśpiiarany
Zołataŭ davoli skieptyčna staviŭsia da pandemii. Tłumačyŭ, što, na jaho dumku, isteryja vakoł zachvorvańnia była zanadta pierabolšana. Raiŭ usim čaściej myć ruki, karystacca antysieptykam — i śćviardžaŭ, što ŭsio budzie dobra. Maŭlaŭ, u śviecie byli kudy bolš surjoznyja zachvorvańni — i navat ich čałaviectva pieramahało.
Mikałaj Zołataŭ: «Navat u nienarmatyŭnaj leksicy nie apisać toje, što jany [siłaviki] rabili z ludźmi. Heta sapraŭdnaje varjactva». Fota: FK «Bastyja»
Adnak pry hetym Mikałaj niehatyŭna staviŭsia da rašeńnia biełaruskaj fiederacyi futbołu adzinaj u Jeŭropie praciahvać nacyjanalny čempijanat, kali ŭvieś astatni kantynient z-za pandemii hulni prypyniŭ. Da taho ž jon asudžaŭ prypiski naviedvańnia matčaŭ vyšejšaj lihi ŭ tyja časy, bo nie razumieŭ, navošta heta rabić z pieršynstvam, jakoje i tak nie karystałasia papularnaściu.
Žorstka asudziŭ hvałt siłavikoŭ
Zołataŭ byŭ adnym z niešmatlikich pradstaŭnikoŭ futbolnaha śvietu Biełarusi, jaki nie prosta vykazaŭsia adnosna padziej žniŭnia-2020, ale i kateharyčna asudziŭ hvałt siłavikoŭ.
«Navat u nienarmatyŭnaj leksicy nie apisać toje, što jany rabili z ludźmi. Heta sapraŭdnaje varjactva», — zajaviŭ Mikałaj. A paśla praz pieravod hrošaj u fond salidarnaści jašče i spravaj dapamoh tym, chto paciarpieŭ ad katavańniaŭ dy zmahaŭsia suprać režymu.
Aburaŭsia ŭvarvańniem va Ukrainu
Zołataŭ maksimalna cviaroza razvažaje, kali analizuje padziei apošnich dvuch miesiacaŭ dy nie prytrymlivajecca paŭtanoŭ ci aściarožnych farmulovak.
«Kali b biełaruskija ŭłady nie pradali dy nie zdali ŭ arendu našuju ziamlu, to hetaja vajna na Uschodzie ŭžo b skončyłasia», — upeŭnieny hulec.
Jen na svaje vočy bačyŭ, što adbyvałasia va Ukrainie, i tamu zaraz nie šukaje słoŭ, kab zachavać palites.
Naprykład, jon u adkrytuju aburyŭsia pavodzinami byłych adnakłubnikaŭ dy kiraŭnictva «Urała», jakija na «Jekaciarynburh-Arenie» zładzili akcyju ŭ padtrymku rasijskich vojskaŭ. «U kłubie ciaham piaci hadoŭ kapitanam źjaŭlajecca ŭkrainiec. Vy jaho ŭvieś hety čas nasili na rukach. Chacia b u znak pavahi da jaho mahli nie rabić hetaj akcyi. Chacia pra što ja? Hrošy bolš važnyja», — prakamientavaŭ biełarus.
Adnak samym jarkim učynkam Zołatava za apošni miesiac nazaviem toje, što jon na ŭłasnym aŭtamabili vyviez brazilskaha futbalista z niebiaśpiečnaj zony.