Navalny zaklikaŭ ZŠA i JeS adkryć «infarmacyjny front» suprać Kramla
Palityk Alaksiej Navalny zaklikaŭ krainy Zachadu i mižnarodnyja IT-karparacyi adkryć infarmacyjny front suprać vajennaj prapahandy Kramla. Zvarot apazicyjaniera, jaki adbyvaje źniavoleńnie ŭ Pakroŭskaj kałonii, apublikavany ŭ jaho ŭ Tvitary.
14.04.2022 / 18:02
Fota: Sputnik
«Dla taho, kab zabivać ukraincaŭ, Pucinu vielmi patrebnyja padtrymka vajny ŭnutry Rasii. I pieršaje, što treba razumieć: nijakaj 75-adsotkavaj padtrymki vajny z Ukrainaj u Rasii niama. Heta chłuśnia Kramla, — śćviardžaje Navalny. — U Rasii za paŭtara miesiaca zakryli i zabłakavali ŭsie niezaležnyja SMI, u tym liku davoli aściarožnyja. Chiba heta spatrebiłasia b, kali b u vajny z Ukrainaj sapraŭdy była takaja padtrymka?»
Praz cenzuru i prapahandu ŭ bolšaści rasijan składvajecca zusim skažonaje ŭjaŭleńnie pra vajnu va Ukrainie, ale navat niahledziačy na błakavańnie sacyjalnych sietak bolš za 85% darosłych hramadzian Rasii štodnia karystajucca servisami Meta (Facebook, Instagram, WhatsApp) i Google (YouTube), piša palityk.
Navalny ličyć, što ŭ hetych sacyjalnych sietkach pavinna być zapuščanaja maštabnaja antyvajennaja kampanija, nacelenaja na rasijskich karystalnikaŭ.
Nam patrebnaja rekłama. Šmat rekłamy. Vielizarnaja nacyjanalnaja antyvajennaja kampanija pačniecca z kampanii rekłamnaj. 200 miljonaŭ pakazaŭ u dzień, kab dastać kožnaha rasijskaha internet-karystalnika dvojčy. Storyz, pasty i preroły. Pa ŭsioj Rasii, u haradach i vioskach. U kožnym płanšecie i kožnym telefonie.
Palityk zaklikaŭ prezidenta ZŠA Džo Bajdena, premjer-ministra Vialikabrytanii Borysa Džonsana, pradstaŭnikoŭ Jeŭrasajuza Ursułu fon der Lajen i Žazepa Barela zakupić rekłamnyja pasty ŭ sacyjalnych sietkach, kab raspaviadać rasijanam praŭdu pra vajnu va Ukrainie.