Hiermanija dazvoliła pastaŭku Ukrainie zienitnych SAU Gepard. Ale Šviejcaryja nakłała vieta na reekspart bojeprypasaŭ da ich
Ministr abarony Hiermanii Kryścina Łambrecht dazvoliła zbrojnaj kampanii Krauss-Maffei Wegmann pradavać Kijevu zienitnyja samachodnyja ŭstanoŭki Gepard. Pra heta jana zajaviła na kanfierencyi ŭ padtrymcy Ukrainy na avijabazie Ramštajn, paviedamiła «Jeŭrapiejskaja praŭda» sa spasyłkaj na časopis Spiegel. Ale Šviejcaryja admaŭlajecca davać zhodu na reekspart bojeprypasaŭ da hetaj zbroi.
27.04.2022 / 20:57
SAU Gepard. Fota Minabarony Ukrainy
Paśla doŭhich vahańniaŭ Hiermanija choča upieršyniu padtrymać Ukrainu ciažkim uzbrajeńniem u vajnie suprać Rasii. Łambrecht abviaściła ŭ aŭtorak ab pieradačy zienitnych SAU i navučańni ŭkrainskich žaŭnieraŭ na terytoryi Niamieččyny.
Takim čynam, hrupa Krauss-Maffei Wegmann atrymała zialonaje śviatło na prodaž Gepard z byłych zapasaŭ Bundeśviera. Taksama hetyja SAU mohuć prymianiacca ŭ baraćbie z naziemnymi celami.
«Gepard — heta mienavita toje, što ciapier treba Ukrainie dla abarony pavietranaj prastory ź ziamli», — skazała Łambrecht na bazie VPS ZŠA ŭ Ramštajnie, dzie kala 40 krain abmierkavali dapamohu Ukrainie.
Ministr abarony ZŠA Łojd Ościn paśla sustrečy zajaviŭ, što Hiermanii pieradaść Ukrainie 50 adzinak Gepard.
I ŭsio było b dobra, ale nieŭzabavie stała viadoma, što ŭrad Šviejcaryi nakłaŭ vieta na reekspart bojeprypasaŭ šviejcarskaj vytvorčaści, jakija vykarystoŭvajucca ŭ hetych samych zienitnych samachodnych ustanoŭkach Gepard. Pra heta paviedamiŭ šviejcarski telekanał SRF.
Šviejcaryja spasyłajecca na svaju palityku niejtralitetu, jakaja zabaraniaje joj adpraŭlać vajskovy ryštunak u zony kanfliktaŭ.
Ciapier Bierlin viadzie pieramovy z Braziłijaj, u jakoj taksama jość takija bojeprypasy. Ale Braziłija takaja kraina, jakaja taksama nie nadta choča ŭmiešvacca ŭ rasijska-ŭkrainskuju vajnu, i ź jaje kiraŭnictvam u Pucina niebłahija dačynieńni.