«Arły» suprać «Džers»: čaho čakać ad siońniašniaha finału Lihi Jeŭropy
Siońnia ŭviečary — pieršy z finałaŭ futbolnych jeŭrakubkaŭ hetaj viasny. Na poli ŭ Sievilli syducca šatłandski «Rejndžers» i niamiecki «Ajntracht Frankfurt». Raskazvajem pra asnoŭnyja abstaviny vakoł hetaj hulni za trafiej Lihi Jeŭropy (LE) — druhoha pa važnaści turniru siarod jeŭrakubkaŭ.
18.05.2022 / 16:39
Balelščyk staić la kopii trafieja Lihi Jeŭropy ŭ Sievilli. Fota: AR
«Rejndžers» moža stać pieršym šatłandskim kłubam, jaki vyjhraje Lihu Jeŭropy
«Džers», jak nazyvajuć hety kłub, uziali svoj pieršy i adziny mižnarodny trafiej jakraz 50 hadoŭ tamu, kali pieramahli ŭ Kubku ŭładalnikaŭ kubkaŭ UEFA. Finał, darečy, taksama prachodziŭ u Ispanii — u Barsiełonie.
U tym ža hodzie šatłandcy zdoleli trapić i ŭ finał Supierkubka UEFA, jaki, adnak, nie prynios im uznaharody. Apošni raz «Rejndžers» udzielničali ŭ jeŭrapiejskim finale ŭ 2008 hodzie, i ciapier im znoŭ pradstaviłasia mahčymaść uziać trafiej jeŭrakubkaŭ.
Šatłandcy ličać, što im heta pa siłach. Paśla pieramohi nad «RB Lejpcyham» u zachaplalnym paŭfinale i pa sumie dvuch matčaŭ bos «Džers» Džavani van Bronkcharst padzialiŭsia, što napiaredadni finału ličyć svaju kamandu zdolnaj «pakazać hulniu, kab dać najlepšyja šansy na pieramohu».
Kapitan «Rejndžers» Džejms Tavierńje (jon ža najlepšy bambardzir letašniaj LE z 7 miačami) nastrojeny nie mienš badziora: «U finał vychodziać nie prosta tak, tamu my nastrojenyja aptymistyčna. My poŭnyja ŭpeŭnienaści i źbirajemsia addać hulni absalutna ŭsio, što ŭ nas jość».
Jak i ich šatłandskija supierniki, «Ajntracht Frankfurt» daŭno nie bačyŭ vialikich mižnarodnych trafiejaŭ. Apošniaja jeŭrapiejskaja ŭznaharoda ŭ ich skarboncy — trafiej Lihi Jeŭropy 1980 hoda (tady turnir prachodziŭ pad nazvaj Kubak UEFA).
U siezon 2018/2019 niemcy amal zdoleli dabracca da finału LE, ale ž ich spyniŭ «Čełsi», jaki i ŭziaŭ trafiej u tym hodzie. Ciapier ža «Frankfurt» usio-taki ŭ finale i maje cudoŭny šaniec na ŭznaharodu. Niamiecki reparcior Džejms Torahud aceńvaje nastroj kamandy tak: «Šmat dla kaho finał u sieradu stanie adzinaj takoj padziejaj u karjery, i heta budzie bitva emocyj i siły voli — i vyhladaje, što mienavita ŭ takich situacyjach «arły» (mianuška frankfurckaha kłuba») vyhladajuć najlepšym čynam».
Brytanski reparcior Aleks O'Chienli śviedčyć, što nie ŭsio tak adnaznačna: «Rejndžers» užo «pakłapacilisia» pra dva kłuby Bundes-lihi z bolš vysokim rejtynham — pra «Barusiju» i «RB Lejpcyh». Hulcy i balelščyki ciapier adčuvajuć aściarožny aptymizm u dačynieńni da taho, što Ispanija moža znoŭ stać placoŭkaj dla vialikaha jeŭrapiejskaha pośpiechu kłuba».
Jak išli da finału
«Ajntracht» nie zdoleŭ pakazać dobryja vyniki ŭ nacyjanalnym čempijanacie, jaho kančatkovaja pazicyja — 11 miesca ŭ Bundes-lizie. Usie svaje namahańni «arły» napravili na prasoŭvańnie ŭ Lizie Jeŭropy, dzie kłub dajšoŭ da finału niepieramožanym — i pa darozie da trafieja adpraviŭ dachaty, miž inšych, «Viest Chem», «Becis» i navat favarytaŭ turniru, «Barsiełonu».
Trochi inšaja situacyja ŭ «Rejndžers», jakija sprabavali damahčysia pośpiechu jak u LE, tak i ŭ nacyjanalnym čempijanacie. U vyniku jany akazalisia druhimi ŭ Šatłandyi — čempijonam krainy staŭ «Sełcik». Dy i da finału jeŭrakubka išli nie tak stabilna, jak sapierniki z Frankfurta: mieli prablemy na hrupavym etapie, dzie zdabyli tolki dźvie pieramohi, adčuvali ciažkaści ŭ płej-of u hulniach z «Crvenaj Zvezdaj» i «Brahaj». Tym nie mienš, šatłandcy, jak užo adznačałasia, zdoleli pa darozie da finału pieramahčy dva niamieckija kłuby — «Lejpcyh» i «Barusiju».
Asnoŭnym favarytam bukmiekieraŭ źjaŭlajecca «Ajntracht», ale roźnica ŭ staŭkach na abodva kłuby nie nadta vialikaja. Chutčej za ŭsio, zabjuć abiedźvie kamandy, ale čakać šmat hałoŭ nie prychodzicca.
Vialikaje futbolnaje śviata — ale biez talismana
Sievilla rychtuje dla haściej finału LE sapraŭdnuju futbolnuju fijestu. Čakajecca, što ŭ hety ispanski horad pryjeduć da 100 tysiač fanataŭ «Rejndžers» i nie mienš za 60 tysiač amataraŭ «Ajntrachta». Užo ciapier kali i možna znajści niejki hatelny numar, to ceny za ich pieravalvajuć za 700 dalaraŭ. Jość i bolš dzikija historyi — naprykład, pra zdaču apartamientaŭ na dźvie nočy pa canie bolš čym 2200 dalaraŭ.
Bilety na matč znajści jašče ciažej, i tyja z fanataŭ, chto nie zdoleŭ kupić kvitok svoječasova, ciapier stajać pierad vybaram: ci zapłacić za bilet da 2000 dalaraŭ. Ale tym fanatam «Rejndžers», jakija nie majuć biletaŭ, daduć mahčymaść pahladzieć hulniu na 60-tysiačnym stadyjonie, dzie prajšoŭ finał Kubka UEFA 2003 hoda.
Inšaja prablema dla fanataŭ — toje, jak dabracca da Sievilli. Zahadzia zabraniravanaje, zdajecca, usio: samaloty, ciahniki i navat aŭtamabili, jakija mahli b dastavić amataraŭ na matč. Isnavali jašče čartarnyja rejsy, ale ich admianili paśla taho, jak ceny za ličanyja dni ŭźlacieli bolš čym na 100 tysiač dalaraŭ. Adzin z takich rejsaŭ, jaki kaštavaŭ 6 maja 155 tysiač dalaraŭ, za try dni ŭźlacieŭ u canie amal da 290 tysiač.
Maleńkaja cikavostka: «Ajntracht» nie zdoleŭ uziać z saboj na finał svoj talisman — arła Aciłu. Ptuška pralataje nad stadyjonam kamandy ŭ kožnaj jaje chatniaj hulni i supravadžaje kłub u kubkavych finałach, ale ž siońnia hetaha nie zdarycca. Usiamu vinoj ispanskija zakony, jakija patrabujuć dla ŭvozu žyvioł vytrymlivać 15-dzionny karancin.
Ci pieraškodzić adsutnaść talismana niemcam? Pabačym siońnia ŭviečary.
«Ajntracht Frankfurt» — «Rejndžers», stadyjon «Ramon Sančes Pischuan», Sievilla, 18 maja 22-00 pa biełaruskim časie.