Jeŭropa abiacaje Ukrainie jašče 9 miljardaŭ jeŭra i «płan Maršała»
Jeŭrasajuz vydzielić Ukrainie dadatkovyja 9 młrd jeŭra dapamohi i źbiraje sajuźnikaŭ dla maštabnaha płana paślavajennaj rekanstrukcyi i reformaŭ, skazała kiraŭnik Jeŭrakamisii Ursuła fon der Lajen. Pra heta piša «Bi-bi-si».
18.05.2022 / 17:17
«Ukraina ciapier na pieradavoj, jana abaraniaje jeŭrapiejskija kaštoŭnaści. My praciahniem padtrymlivać ukraincaŭ i pakul idzie vajna, i kali jany buduć adbudoŭvać krainu paśla», — skazała fon der Lajen.
Kolki hrošaj moža syści na adnaŭleńnie ŭsiaho razburanaha rasijskaj armijaj, fon der Lajen nie ŭdakładniła. Jana skazała tolki, što ES nie źbirajecca rabić usio heta sam, jamu patrebnyja sajuźniki.
Pra novy «płan Maršała» dla Ukrainy napiaredadni kazała kiraŭnica Minfina ZŠA Džanet Jelen, a siońnia kiraŭnik MZS Vialikabrytanii Liz Tras udakładniła, što krainy «Vialikaj siamiorki» abmiarkoŭvajuć, jak prymusić Rasiju častkova apłacić jaho. Havorka idzie pra sotni miljardaŭ jeŭra.
Na pačatku krasavika vosiem viadučych ekanamistaŭ papiarednie acanili patrebu Ukrainy ŭ dapamozie dla adnaŭleńnia paśla vajny ŭ 200—500 młrd jeŭra, abapirajučysia na vopyt Jeŭropy paśla Druhoj suśvietnaj, abjadnańnia Hiermanii, rekanstrukcyi Afhanistana, Iraka, Kuviejta i inšyja madeli.
Jany pisali tady, što finansavaja dapamoha biez reformaŭ budzie bieskarysnaja, i fon der Lajen siońnia vykazałasia ŭ tym ža samym duchu.
«Spatrebiacca klučavyja reformy ŭ halinie baraćby z karupcyjaj, dziaržkiravańnia, viaršenstva zakona i niezaležnaści sudoŭ. Płan reformaŭ pavinien być vyrazna ŭviazany z «zialonaj» pierabudovaj, ličbavizacyjaj i asnoŭnymi jeŭrapiejskimi kaštoŭnaściami», — skazała jana.