Hienieralny sakratar NATA: My pavinny być hatovyja dapamahać Ukrainie doŭha
Hienieralny sakratar NATA Jens Stołtenbierh papiaredziŭ udzielnikaŭ Aljansu, što bajavyja dziejańni va Ukrainie pierachodziać u «vajnu na źniasileńnie», a značyć, Kijevu spatrebicca bolš dapamohi ad Zachadu. Pa słovach Stołtenbierha, zabiaśpiečvać Ukrainu zbrojaj, chutčej za ŭsio, pryjdziecca na praciahu doŭhaha pieryjadu.
26.05.2022 / 20:24
«My pavinny być hatovyja da doŭhaj vandroŭki. Hetaja vajna moža doŭžycca doŭha, i my pavinny być hatovyja. Jak doŭha, nichto nie moža skazać», — zajaviŭ jon u intervju hrečaskamu partału Kapital.group.
Adnosna roli NATA jon skazaŭ:
«NATA maje dźvie zadačy. Pa-pieršaje, akazać padtrymku Ukrainie. Mienavita tamu my, sajuźniki i partniory NATA, Jeŭrapiejski Sajuz i Aŭstralija, a taksama mnohija inšyja krainy, akazvajem značnuju padtrymku.
Spačatku heta była pieradača pieradusim savieckaha abstalavańnie, a zaraz my taksama dajom usio bolš i bolš standartnaha ŭzbrajeńnia NATA. I, viadoma ž, isnuje taksama vialikaja patreba ŭ navučańni karystacca hetym novym sučasnym uzbrajeńniem, i ja zaklikaju sajuźnikaŭ padvoić svaje namahańni.
Druhaja zadača NATA — kab vajna nie pašyrałasia. Hałoŭnaj adkaznaściu NATA źjaŭlajecca abarona ŭsich sajuźnikaŭ pa NATA, miljarda ludziej, jakija žyvuć u krainach NATA. I dla hetaha my pavinny praduchilić eskałacyju.
Tamu my padtrymlivajem našaha blizkaha partniora, Ukrainu, ale nie šlacham niepasrednaha ŭdziełu ŭ kanflikcie šlacham adpraŭki vojskaŭ NATA».