Novy rekord pa palityčnych spravach: 22 hady kałonii dali Viačasłavu Malejčuku
U Minskim abłasnym sudzie ahučyli prysud 37-hadovamu ŭradžencu Pinščyny Viačasłavu Malejčuku pa «fakcie arhanizacyi 25 sakavika 2021 hoda aktaŭ teraryzmu ŭ haradach Barysavie i Minsku». Sudovaja kalehija pad staršynstvam suddzi Uładzimira Areški pryznačyła jamu pakarańnie ŭ vyhladzie 22 hadoŭ kałonii va ŭmovach strohaha režymu, piša «Viasna».
30.05.2022 / 17:15
Malejčuka vinavacili pa šerahu artykułaŭ Kryminalnaha kodeksa: č. 1 art. 14 i č. 1 art. 289, č. 1 art. 13 č. 3 art. 289 (padrychtoŭka i zamach na akt teraryzmu), č. 3 i č. 4 art. 295 (niezakonnyja dziejańni ŭ dačynieńni da vybuchovych rečyvaŭ), č. 1 art. 295-3 (niezakonnyja dziejańni ŭ dačynieńni da pradmietaŭ, dziejańnie jakich zasnavanaje na vykarystańni haručych rečyvaŭ).
Nahadajem, 26 sakavika 2021 hoda MUS zajaviła, što nibyta praduchiliła terakty ŭ Čyžoŭcy i ŭ vajskovaj čaści ŭ Piečach. Na videa pakazali Malejčuka, jaki kazaŭ, što atrymaŭ zahad ad kahości z «Bajpoła». Ale naziralniki pryjšli da vysnovy, što mieła miesca pravakacyja z boku nieŭstanoŭlenych asob, jakija vydavali siabie za bajpołaŭcaŭ. Sam ža Malajčuk vyhladaŭ vypadkovym čałaviekam, jakoha razyhrali.
Sud nad Viačasłavam Malejčukom byŭ zakryty, tamu nijakich padrabiaznaściaŭ pra jaho spravu hramadstva nie viedaje.