Ź Biełarusi evakujavany dyzajnier, jaki malavaŭ afišy maršaŭ 2020-ha
Dyzajnier Artur Vakaraŭ evakujavany ź Biełarusi pry dapamozie fondu «Bajsoł».
22.06.2022 / 00:58
Pra heta paviedamiŭ u siabie ŭ Fejsbuku kiraŭnik fondu Andrej Stryžak.
«Ja rabiŭ i rablu tak šmat, što navat nie viedaju pavodle jakoj spravy 13 červienia mianie vyklikali ŭ Śledčy kamitet. Skazali źjavicca ŭ jakaści śviedki pa kryminalnaj spravie na Pieršamajskuju, 7 (USK pa Minsku) da śledčaha takoha. Pa jakoj kankretna spravie, admovilisia adkazać», — kazaŭ Artur.
Artur Vakaraŭ — dyzajnier, zasnavalnik studyi dyzajnu «Adliha». Jon supracoŭničaŭ z roznymi kulturnymi i hramadskimi ŭstanovami. Malavaŭ dla «Radyjo Svaboda», «Art-siadziby», «Budźma», «Jeŭraradyjo», «Latučaha ŭniviersiteta». Taksama pracavaŭ ź viadomymi biełaruskimi muzykami. Rabiŭ vokładki dla knih Akudoviča, Mackieviča, Razanava, Klinava, Marcinoviča, Babkova.
Padčas pratestaŭ 2020-ha malavaŭ afišy niadzielnych Maršaŭ. Apošnija hady raspracoŭvaŭ kampanii dla Paŭła Biełavusa: śviatkavańnie ŭhodkaŭ BNR, «Hodna», «Homan», «Buś Biełaruś» i šmat inšych.