Pastaŭki małaka i miasa ź Biełarusi ŭ Rasiju źmienšylisia na 5—7%
Pastaŭki miasa i małaka ź Biełarusi ŭ Rasijskuju Fiederacyju źmienšylisia prykładna na 5—7%, zajaviŭ u intervju TASS kiraŭnik Rassielhasnahladu Siarhiej Dankviert, pišuć «Biełorusy i rynok».
22.06.2022 / 22:57
Pa słovach rasijskaha čynoŭnika, heta moža być źviazana z zakryćciom miežaŭ Biełarusi z Ukrainaj i Polščaj i, adpaviedna, skaračeńniem abjomu pradukcyi, jakaja zakuplajecca tam.
«Vyzvalenyja nišy zakryvajucca za košt unutranaj vytvorčaści, a dla ekspartu zastajecca mienš resursaŭ», — skazaŭ Siarhiej Dankviert.
Varta adznačyć, što ŭ pačatku 2022 hoda Rassielhasnahlad pry praviadzieńni łabaratornych analizaŭ pradukcyi, jakaja ŭvozicca ź Biełarusi na terytoryju Rasii, fiksavaŭ vialikuju kolkaść parušeńniaŭ i nieadpaviednaściaŭ normam i patrabavańniam zakanadaŭstva. U vyniku biełaruskija miasa i małako časam brakavalisia, častka tavaraŭ nie dapuskałasia na rasijski spažyviecki rynak.
Tak, u krasaviku biahučaha hoda ŭ ramkach manitorynhu pradukcyi žyviołahadoŭli, jakaja pastupała ŭ Rasiju ź Biełarusi, było vyjaŭlena 45 nieadpaviednaściaŭ vieterynarna-sanitarnym patrabavańniam JEAES. Hety pakazčyk amal u try razy pieravyšaje kolkaść vyjaŭlenych parušeńniaŭ zakanadaŭstva ŭ pieršym kvartale 2022 hoda (16 vypadkaŭ).
Siarhiej Dankviert adznačyŭ, što ciapier Rassielhasnahlad pastajanna znachodzicca na suviazi z kalehami ź Biełarusi. «My paviedamlajem im pra ŭsie znojdzienyja parušeńni, i jany sami prymajuć miery i reahujuć. Pakul my bolš adkryvajem dla pastavak biełaruskija pradpryjemstvy, čym zakryvajem», — paviedamiŭ Dankviert.