Palitviaźnia Dzianisa Hrachanava, jakoha ŭ lutym na «chimii» zatrymaŭ KDB, asudzili pa novaj kryminalnaj spravie
U sudzie Savieckaha rajona Homiela 5 lipienia razhladzieli kryminalnuju spravu 44-hadovaha palitviaźnia Dzianisa Hrachanava, asudžanaha raniej na paŭtara hoda «chimii» za nadpis «Nie zabudziem» kala mietro «Puškinskaja» ŭ Minsku. 15 lutaha 2022 hoda Dzianisa zatrymaŭ KDB naŭprost u papraŭčaj ustanovie pad Kamiencam. Paźniej palitviaźniu pradjavili abvinavačvańnie pavodle art. 368 Kryminalnaha kodeksa (Abraza Łukašenki). Piać miesiacaŭ da suda jaho ŭtrymlivali ŭ homielskim SIZA. Pa chadajnictvie prakurora sud amal adrazu zrabili zakrytym. Suddzia Volha Cierachava kančatkova pryznačyła Hrachanavu pa sukupnaści prysudaŭ z ulikam raniej nieadbytaha pakarańnia — adzin hod i siem miesiacaŭ źniavoleńnia, paviedamlaje «Viasna».
07.07.2022 / 11:18
Dzianisa Hrachanava supracoŭniki KDB zatrymali 15 lutaha ŭ papraŭčaj ustanovie adkrytaha typu № 45 pad Kamiencam, kudy jaho nakiravali adbyvać termin za naniasieńnie nadpisu «Nie zabudziem» kala stancyi mietro «Puškinskaja». Tady ŭ palityčnych «chimikaŭ» masava prajšli pieratrusy i dopyty z nahody ŭdziełu ŭ telehram-čacie «Volejboł po vychodnym», jaki ŭłady ŭnieśli ŭ śpis ekstremisckich farmavańniaŭ.
Hety čat abjadnoŭvaŭ palitviaźniaŭ, asudžanych na «chimiju».
Paśla zatrymańnia Hrachanava pieraviali ŭ homielski SIZA-3 i raspačali suprać jaho novuju kryminalnuju spravu za abrazu Łukašenki.
Padrabiaznaściej z sudovaha pasiadžeńnia niama, bo sud amal adrazu zrabili zakrytym. Spravu razhledzieli mienš za dźvie hadziny. Pavodle infarmacyi «Homielskaj Viasny», prakuror Bułybienka prasiŭ sud pakarać Dzianisa adnym hodam i siamiu miesiacami źniavoleńnia, ale suddzia Cierachava prysudziła paŭtara hoda. Palitviaźniu kančatkova pryznačyli pa sukupnaści prysudaŭ z ulikam raniej nieadbytaha pakarańnia — adzin hod i siem miesiacaŭ pazbaŭleńnia voli.
Nahadajem, u sudzie Frunzienskaha rajona Minska 8 śniežnia 2020 hoda Dzianisu prysudzili paŭtara hoda abmiežavańnia voli z nakiravańniem u PUAT i vyzvalili ŭ zale suda. Jaho pryznali vinavatym pavodle č. 2 art. 339 Kryminalnaha kodeksa «Chulihanstva, ździejśniennaje hrupaj asobaŭ» za abnaŭleńnie nadpisu «Nie zabudiem!» kala narodnaha miemaryjała, pryśviečanaha zabitamu pratestoŭcu Alaksandru Tarajkoŭskamu.
Padtrymajcie Dzianisa banderolami, pasyłkami, hrašovymi pieravodami i listami salidarnaści pa adrasie:
SIZA-3, 246003, h. Homiel, vuł. Knižnaja, 1A,
Dzianisu Leanidaviču Hrachanavu.