Pry novaj carkvie ŭ Mazyry stvorać «vajenna-patryjatyčny kłub»
U Mazyry zaviaršylisia hramadskija abmierkavańni pa pytańni budaŭnictva ŭ horadzie novaha pravasłaŭnaha chrama Maskoŭskaha patryjarchatu. Krytyku vyklikała nie tolki rašeńnie pabudavać carkvu ŭ honar rasijskaha vajennaha hieroja Alaksandra Nieŭskaha, ale i miesca, vydzielenaje dla chrama — la haradskoj lakarni i parka «Maładziožny», lubimaha miesca adpačynku i zaniatkaŭ sportam haradžan, paviedamlaje «Fłahštok».
03.08.2022 / 15:44
Na 2 žniŭnia miascovyja ŭłady anansavali praviadzieńnie sustrečy ŭ rajvykankamie ŭ ramkach hramadskich abmierkavańniaŭ. Adnak ni 2, ni 3 žniŭnia nijakaj aficyjnaj infarmacyi pra vyniki sustrečy nie źjaviłasia.
Napiaredadni pradstaŭnik Turaŭskaj jeparchii ijerej Alaksandr Bušlakoŭ zajaviŭ miascovamu TB, što terytoryja, vydzielenaja pad budaŭnictva chrama, nie adnosicca da parka «Maładziožny», i, jak zapeŭniŭ śviatar, «nivodnaje dreva parku nie paciarpić». A taksama harantavaŭ, što haradžanie pa-raniejšamu zmohuć zajmacca sportam u parku. Bolš za toje, śviatar paviedamiŭ, što pry chramie budzie stvorany «moładzievy vajenna-patryjatyčny kłub», dzie zmohuć zajmacca dzieci.
Tym časam u siecivie źjavilisia fota prajekta carkvy. Haradžanie pakinuli svaje kamientaryi pad paviedamleńniem u pabliku prychoda:
«Jon navat nie pryhožy. Vy što, ździekujeciesia?»
«U toj čas, kali «blistaŭ» Nieŭski — vasał Załatoj Ardy, na ziemlach, dzie vy sabralisia budavać u honar jaho chram, tatary byli tolki nabiehami, im tut boj davali. I ziemli hetyja byli ŭ składzie VKŁ, ź jakim «śviaty» byŭ u «naciahnutych» adnosinach. Nie treba naviazvać nam čužych «śviatych hierojaŭ». U nas byŭ Davyd Haradzienski, jaki nie mienš paśpiachova zmahaŭsia z kryžakami».
«Čamu ŭličvajecca mierkavańnie i prośba nievialikaj častki ludziej, jakoj patrebny chram, a nie ŭličvajecca mierkavańnie vialikaha mnostva ludziej, jakija padpisali pietycyju, i naohuł suprać hetaj budoŭli?»
Raniej sa spasyłkaj na načalnika addzieła architektury i budaŭnictva Mazyrskaha rajvykankama Alaksandra Ražka miascovaje TB zajaŭlała, što pa vynikach hramadskaha abmierkavańnia «zakazčyku buduć prapanavanyja inšyja placoŭki dla budaŭnictva chrama».