«Heta absalutny skandał». Polšča maje namier rašuča adkazać na pryhavor Irynie Słaŭnikavaj
Kiraŭnik polskaha ŭrada Matevuš Maraviecki daručyŭ polskamu MZS pryniać rašučyja miery ŭ suviazi z pryhavoram žurnalistcy Irynie Słaŭnikavaj, asudžanaj siońnia na 5 hadoŭ kałonii. Maraviecki nazvaŭ prysud «nieprymalnym».
03.08.2022 / 22:06
Iryna Słaŭnikava padčas vyniasieńnia pryhavora. Fota: @bajby
«Svaboda druku, słova i svabodnaje prava vykazvać svajo mierkavańnie zjaŭlajucca krajevuholnymi kamianiami demakratyi. Prysud režymam Łukašenki žurnalistki Iryny Słaŭnikavaj da 5 hod kałonii strohaha režymu — heta absalutny skandał, parušeńnie ŭsich normaŭ cyvilizacyi, pravoŭ čałavieka i žurnalisckich standartaŭ.
Hety nieprymalny prysud vykliča nieadkładnuju i rašučuju reakcyju Polščy na mižnarodnym uzroŭni. Ja daručyŭ Ministerstvu zamiežnych spraŭ zrabić nieadkładnyja i rašučyja kroki», — napisaŭ premjer-ministr u fejsbuku.
Irynu Słavnikavu zatrymali ŭ minskim aeraporcie ŭ kastryčniku 2021 hoda paśla viartańnia z adpačynku. Jana pryznana palitviaźniem. Raniej Iryna pracavała na «Biełsat TB», u apošni čas supracoŭničała z polskim telebačańniem TVP. Žurnalistku abvinavačvali ŭ stvareńni ekstremisckaha farmiravańnia» (č. 1 art. 361-1 KK) i arhanizacyi i padrychtoŭcy dziejańniaŭ, jakija hruba parušajuć hramadski paradak» (art. 342 KK).
Rajonny sud Homla siońnia pryznaŭ Słaŭnikavu vinavataj u «stvareńni ekstremisckaha farmavańnia» i asudziŭ na 5 hadoŭ pazbaŭleńnia voli ŭ kałonii. Prysud byŭ navat bolš žorstki, čym chacieła abvinavačańnie, jakoje patrabavała 4 hady kałonii.