Пашыраюць тэрыторыю могілак «Лясныя» ў Мінску, яе хопіць на 5 гадоў
У найбліжэйшыя дні адкрыецца новая тэрыторыя могілак «Лясныя» ў Мінску. Пра гэта агенцтву «Мінск-Навіны» паведаміў дырэктар ГП «Гардарбуд» Сяргей Панеў.
15.08.2022 / 21:33
Па інфармацыі агенцтва, новая тэрыторыя разлічаная на 25,9 тысяч пахавальных месцаў. Плюс — калумбарныя сцены. На найбліжэйшыя пяць гадоў участка хопіць.
«Гардарбуд» плануе забетанаваць пад'язную дарогу і па меры неабходнасці яшчэ пашыраць пагост. У рэзерве ёсць 70 гектараў тэрыторыі патэнцыйнай умяшчальнасцю ў 60 тысяч пахаванняў.
Могілкі, пра якія ідзе гаворка, размешчаныя за 4 кіламетры на паўднёвы ўсход ад МКАД каля вёскі Вялікі Трасцянец. Іх адкрылі ў 2021 годзе. Гэта адзіныя з могілак Мінска з даступнымі ўсімі відамі пахаванняў.
Сярод іншых на гэтых могілках у мінулым годзе быў пахаваны праграміст Андрэй Зельцэр, які загінуў у перастрэлцы з сілавікамі, што ўзламалі ягоную кватэру.