Mašynu pryncesy Dyjany pradali na aŭkcyjonie za 850 tysiač dalaraŭ
Mašyna Ford Escort RS Turbo S1, jakaja naležała brytanskaj pryncesie Dyjanie z 1985 pa 1988 hod, pajšła z małatka na aŭkcyjonie Silverstone. Novy ŭładalnik zapłaciŭ za aŭto 724,5 tys. funtaŭ sterlinhaŭ, abo bolš za 851 tys. dalaraŭ, paviedamlajecca na sajcie placoŭki.
28.08.2022 / 17:02
Pryncesa karystałasia mašynaj niačasta: prabieh aŭtamabila na ciapierašni momant krychu mienšy za 25 tys. mil, abo 40 tys. km. A za hady, jakija im vałodała Dyjana, jon i ŭvohule prajechaŭ usiaho kala 6800 mil, abo mienš za 11 tys. km.
Pieršapačatkova Ford byŭ bežavym, ale jaho vyrašyli pierafarbavać u čorny koler z punktu hledžańnia biaśpieki. Praduhledžanaje ŭ mašynie dadatkovaje lusterka zadniaha vidu dla supracoŭnika achovy, a ŭ bardačku aŭtamabila jość radyjopryjomnik.
Pry hetym vybar takoha aŭto ličyŭsia nieardynarnym dla pradstaŭnika karaleŭskaha dvara, bo ŭ mašyny tady była reputacyja zanadta narodnaj.
Mašyna viadomaja jašče i tym, što čaściakom traplała ŭ kadr, kali Dyjana pryjazdžała na joj pa pakupki ŭ buciki Čełsi, a taksama parkavałasia kala restaranaŭ Kiensinhtona. Pradstaŭniki aŭkcyjonu ŭdakładnili, što na niekatorych fotazdymkach možna ŭbačyć na zadnim siadzieńni aŭto maleńkaha prynca Uiljama, spadčyńnika brytanskaha tronu.