Упершыню за перадачу інфармацыі ТГ-каналу інкрымінавалі здраду радзіме
32-гадоваму жыхару Гомельскага раёна інкрымінаваная «здрада дзяржаве» за перадачу тэлеграм-каналам інфармацыі пра вайсковыя аб'екты, паведамляе «Вясна».
30.08.2022 / 14:50
Згодна з матэрыяламі справы, мужчына «збіраў, фіксаваў і аналізаваў інфармацыю разведвальнага характару пра аб'екты ваеннай інфраструктуры і тэхнікі, у тым ліку пра беларускія ваенныя аб'екты». Як піша пракуратура, пасля ён перадаў атрыманую інфармацыю ў чат-бот тэлеграм-канала, які «кантралюецца замежнай арганізацыяй». Мужчыну пагражае ад 7 да 15 гадоў пазбаўлення волі.
Гэта першы выпадак з пачатку вайны ва Украіне, калі затрыманаму інкрымінуюць «здраду дзяржаве» за перадачу тэлеграм-каналам інфармацыі пра вайсковыя аб'екты. Раней людзям інкрымінавалі арт. 361-4 КК (садзейнічанне экстрэмісцкай дзейнасці) — гэты артыкул прадугледжвае пакаранне да 6 гадоў калоніі.