Biełaruskich pamiežnikaŭ abvinavacili ŭ maradziorstvie, jany havorać pra dziejańni ŭ ekstremalnaj situacyi
Ukrainski žurnalist Andrej Caplijenka apublikavaŭ videa, na jakim vidać, što ludzi ŭ formie pryjazdžajuć na mašynie «UAZ» da hruzavikoŭ, jakija stajać na darozie, i niešta zabirajuć ź ich. Videa vidavočna źniata z drona. Z hetaha ŭźnik nievialiki skandał, bo Caplijenka abvinavaciŭ biełaruskich pamiežnikaŭ u maradziorstvie.
02.09.2022 / 21:29
«Heta biełaruski ŭčastak aŭtatrasy E85 kala punkta propusku «Makrany», što nasuprać ukrainskaha KPP «Damanava». Tut, na darozie, z momantu rasijskaha ŭvarvańnia stajać hruzaviki na ŭkrainskaj rehistracyi. Biełarusy padjechali na štatnaj «buchancy» i pačali «bambić» aŭtaciahniki. Zabirali čužoje, toje, što, na ich dumku, drenna lažyć. I, jak zvyčajnyja złodziei, z kradzienymi rečami jak maha chutčej źliniali ź miesca złačynstva. Na słužbovaj mašynie», — zajaviŭ žurnalist.
Biełaruski Dziaržpahrankamitet adreahavaŭ na abvinavačańnie nadzvyčaj apieratyŭna. Nie admaŭlajučy sapraŭdnaści videa, pamiežniki aburylisia takoj jaho interpretacyjaj. Pavodle aficyjnaj viersii, pamiežniki vymušana ŭziali ŭ hruzaviku la miažy vohnietušycieli dla baraćby z pažaram:
«Dziaržpahrankamitet aficyjna paviedamlaje, što pablizu biełaruska-ŭkrainskaj miažy adbyłosia ŭzharańnie travy i halinak. Z pryčyny vyčarpańnia štatnych vohnietušycielaŭ biełaruskija pamiežniki dla łakalizacyi ŭzharańnia byli vymušanyja vykarystoŭvać vohnietušyciel, jaki znachodziŭsia ŭ hruzavoj mašynie», — śćviardžaje DPK.
«Apieratyŭnyja dziejańni vajskoŭcaŭ adpaviadali situacyi, jakaja skłałasia, i dazvolili praduchilić dalejšaje raspaŭsiudžvańnie ŭzharańnia», — apraŭdvajuć svaje dziejańni siłaviki.