Ci biaśpiečna jeści pradukty, jakija lažali la cviłoj ježy?
Voś što treba viedać pra toje, ci mohuć zacviłyja pradukty škodna paŭpłyvać na ježu, što lažyć kala ich. Ci treba vykidać takija pradukty?
22.09.2022 / 15:45
Fota: pixabay.com
Ekśpierty kažuć, što adzin cviły jabłyk sapraŭdy moža sapsavać inšyja, kala jakich jon lažyć, ale na heta treba čas. Navat kali pradukt dakranaŭsia da cviłoj ježy, jaho možna vymyć i spakojna źjeści. Ale ž jość rečy, jakija važna pry hetym uličvać, piša Huffpost.
Cvil zvyčajna raspaŭsiudžvajecca praź pieranos spor u pavietry, jaje mohuć taksama pieranosić vada ci nasiakomyja. Voś čamu cvil moža lohka pieranosicca, naprykład, z adnaho pamidora na druhoha, jaki dakranajecca da jaje. Tamu najlepšy vybar — vykinuć pradukt, na jakim źjaviłasia cvil, i ahledzieć pradukt, jaki lažaŭ pobač ź im. Kali na im taksama cvil, ci jon źmiak, u jaho pamianiaŭsia koler, to jaho taksama varta vykinuć.
Jość vidy cvili biaśpiečnyja dla zdaroŭja, časam jany navat robiać ježu bolš kaštoŭnaj — zhadajcie toj ža samy syr ź cvillu. Ale jość i vidy cvili, što vyklikajuć surjoznyja chvaroby, vyłučajuć bakteryi i taksiny, jakija škodziać zdaroŭju.
Kali plamka cvili małaja, to jaje možna prosta vyrazać, a reštu płoda — źjeści. Tak byvaje, naprykład, na harodninie typu kapusty, bałharskaha pierca ci morkvy. Ale starajciesia nie dakranacca nažom da samoj cvili, kab nie zanieści jaje na zdarovuju častku praduktu.
Nikoli nie niuchajcie cviłoj ježy, bo tak vy možacie ŭdychnuć spory cvili, što moža vyklikać reśpiratornuju chvarobu. I navat kali pradukt vyhladaje narmalna abo kali vy vyrazali ź jaho cvil, heta nie aznačaje, što pradukt całkam biaśpiečny, bo niekatoryja škodnyja mikraarhanizmy nijak siabie nie prajaŭlajuć.
Kab siabie zaścierahčy, myjcie sadavinu i harodninu i starajciesia nie jeści jaje syroj. Taksama lepiej trymać syroje miasa i inšyja syryja pradukty asobna ad pryhatavanych.
Kali ž vy ŭsio-taki źjeli niešta cviłoje i ŭ vas źjavilisia simptomy alerhii, źviarniciesia da doktara. Simptomy alerhii na cvil — raptoŭnaja dychavica, młosnaść, lichamanka abo dyjareja.