За апошнія суткі затрымалі як мінімум 15 чалавек
Валанцёрская ініцыятыва @spiski_okrestina адзначыла, што па яе звестках учора, 27 верасня, па Беларусі былі затрыманыя 15 чалавек.
28.09.2022 / 18:07
Фота ілюстрацыйнае
Прозвішчы затрыманых пералічаныя ў тэлеграм-канале ініцыятывы.
«Мы не ведаем, у чым прычына такіх актыўных затрыманняў учора: рэтраградны Меркурый, план за месяц ці яшчэ што, але толькі па звестках валанцёраў учора былі затрыманыя тры сям'і», — адзначаюць валанцёры.
Пры гэтым практыка паказвае, што тое, што робіцца вядомым валанцёрам — далёка не ўсе затрыманні. Пра многія з іх становіцца вядома толькі пастфактум, ці інфармацыя ўвогуле не выходзіць на паверхню.
Валанцёры настойліва рэкамендуюць не хадзіць у РУУС і следчыя органы без адваката, пачысціць акаўнты ў сацыяльных сетках і загадзя заключыць дамову з адвакатам «на ўсялякі выпадак».