«Kabiniet hienieralnaha dyrektara navyvarat vyviernuli». Stali viadomyja padrabiaznaści pahromu ŭ «Biełahra»
Paśla ŭčorašniaha nalotu siłavikoŭ na ofisy TAA «Biełahra Bieł» byli zatrymanyja hiendyrektar pradpryjemstva i niekalki supracoŭnikaŭ. Pra heta Reform.by raspaviali śviedki.
30.09.2022 / 15:04
Pieratrusy i zatrymańni byli ŭ dvuch ofisach — na vulicy Piatra Hlebki, 11 i Ilimskaj, 5.
«U ofisie na Hlebki — pahrom, kabiniet hienieralnaha dyrektara navyvarat vyviernuli. Zabrali dyrektaraŭ, pa biaśpiecy, buchhałtara, sakratara. Tyja chto byŭ na vulicy i tyja, čyje kabiniety byli z uvachodam z druhoha boku budynka — pad šumok zmatalisia dadomu», — kaža vidavočca.
Supracoŭnik «Biełahra» raspavioŭ, što siońnia ofis kampanii na vulicy Pietrusia Hlebki praciahvaje pracavać, ale rabotniki napałochanyja, a niechta nie pryjšoŭ i vyrašyŭ schavacca, bo byŭ na fota razam z zatrymanymi.
«Na inšym ofisie, jaki na Ilimskaj, strat, akramia buchhałtara z kampjutaram, byccam niama. Mnohija siońnia z Hlebki pracujuć na Ilimskaj. Tam spakojna, chacia prychodzili i tudy», — patłumačyŭ supracoŭnik i adznačyŭ, što eks-viadučy ANT i kiraŭnik prezidenckaha puła Dźmitryj Siemčanka pracavaŭ u ofisie na Hlebki.
Vidavočca nie viedaje, kolki supracoŭnikaŭ zatrymali.
«Hiendyrektara [Uładzimir Piatroŭski], sakratarku, buchhałtara [Piatroŭskaja, žonka hiendyrektara] zabrali dakładna», —raspavioŭ supracoŭnik kampanii.
Raniej pravaabarončy centr «Viasna» paviedamiŭ, što viadoma pra zatrymańnie Kiryła Malentoviča, Dźmitryja Leviankova, Ludmiły Hiecman i Arcioma Zubrakova. Usie jany pracujuć u addziele zakupak.
Praŭładnyja telehram-kanały śćviardžajuć, što na čatyroch čałaviek zaviedzienyja kryminalnyja spravy (proźviščy nie nazyvalisia), «źviazanyja z narkotykami, raspalvańniem nianaviści i varožaści, udziełam u masavych biesparadkach 2020 hoda, akazańniem sadziejničańnia ekstremisckim farmavańniam».
29 vieraśnia supracoŭniki HUBAZiK pry siłavoj padtrymcy SAChR i AMAP pryjšli ŭ ofisy TAA «Biełahra» u Minsku. Padstavaj dla pahromu nibyta pasłužyła nacyjanalnaja simvolika ŭ pamiaškańni.
U kampanii pracuje pres-sakratarom Dmitryj Siemčanka, eks-viadučy ANT i kiraŭnik prezidenckaha puła. Jon syšoŭ z telekanała ŭ žniŭni 2020 hoda. Siemčanku zatrymali 15 vieraśnia i pakarali 15 sutkami aryštu za «drobnaje chulihanstva».