Na aknie ŭ centry Mahilova vyviesili partrety rasijskich samadzieržcaŭ i Puškina. Navošta?
Partrety piersanažaŭ rasijskaj historyi zaŭvažyli ŭ Mahilovie ŭ aknie štaba Vachty pamiaci palehłych za Ajčynu. Tam vyviesili fota rasijskich samadzieržcaŭ Kaciaryny I dy Mikałaja II, a taksama piśmieńnika Alaksandra Puškina. «Niaŭžo ŭ biełaruskaj historyi nie znajšłosia hierojaŭ, na podźvihach jakich naša moładź mahła b vučycca patryjatyzmu?» — aburajecca adzin z miascovych.
03.10.2022 / 19:43
Štab vachty pamiaci mieścicca na centralnaj vulicy Mahilova — Pieršamajskaj, pobač z płoščaj Słavy. Na joj la viečnaha ahniu miemaryjału «Baraćbitam za savieckuju ŭładu» vystaŭlajecca karavuł apranutych u vajskovaje školnikaŭ. Vokny štabu hladziać na aleju słavy z partretami słavutych udzielnikaŭ Druhoj suśvietnaj vajny.
U Centry pa pracy z dziećmi i moładdziu «Junactva» tłumačać, što fotazdymki z rasijskimi samadzieržcami i dziejačami kultury vyviesili da Dnia narodnaha adzinstva, heta ekspanaty tematyčnaj kvest-hulni.
«Źviarnicie ŭvahu, — davodziać u Centry, — tam napisana, što hetyja histaryčnyja asoby byvali ŭ Mahilovie».
U ekspazicyi z rasijskimi carami i Puškinym vyviešany taksama fotazdymak savieckaha piśmieńnika Kanstancina Simanava. Byŭšy vajennym karespandentam, jon apisaŭ u ramanie «Živyje i Miertvyje», jak baranili Mahiloŭ ad nacystaŭ. Pa śmierci Simanava jahony prach byŭ raźvieiany na Bujnickim polem pad Mahilovam.
U Centry «Junactva» zhadžajucca, što ŭ Mahilova praciahłaja historyja i jaho naviedvali nie tolki piersanažy rasijskaj historyi. Supracoŭniki zapeŭnili, što nieŭzabavie vystavu ŭ aknie zamieniać inšymi ekspanatami.