Пуцін падпісаў указ аб пераводзе Запарожскай АЭС ва ўласнасць Расіі
Расійскаму ўраду даручана прыняць меры для стварэння Федэральнага дзяржаўнага ўнітарнага прадпрыемства «Запарожская АЭС», за якім будзе замацаваная маёмасць станцыі.
05.10.2022 / 18:54
Фота: AP Photo
«Забяспечыць прыняцце ў федэральную ўласнасць аб'ектаў выкарыстання атамнай энергіі Запарожскай атамнай электрастанцыі і іншай маёмасці, неабходнай для ажыццяўлення яе дзейнасці», — гаворыцца ў дакуменце.
Запарожская АЭС — самая буйная атамная электрастанцыя ў Еўропе. На станцыі працягвае працаваць украінскі персанал.
Блізкасць Запарожскай АЭС да лініі фронту ўжо даўно выклікае сур'ёзныя асцярогі ў міжнароднай супольнасці, паколькі патэнцыйна пагражае ядзернай катастрофай.
Занепакоенасць сусветнай супольнасці звязаная з пастаяннымі абстрэламі станцыі, у якіх Украіна і Расія абвінавачваюць адзін аднаго.