Суд спыніў справу супраць жыхаркі Цюмені з-за надпісу «Нет в***е». Дзяўчына сцвярджала, што мела на ўвазе «Нет вобле»
Па звестках тэлеграм-канала «Цюмень — багаты рэгіён!», 30-гадовую жыхарку горада затрымалі 24 верасня з-за таго, што яна намалявала сіняй крэйдай на асфальце надпіс «Нет в***е».
13.10.2022 / 10:36
Дзяўчыну абвінавацілі ў «дыскрэдытацыі расійскай арміі», ёй пагражаў штраф ад 30 да 50 тысяч рублёў. Таксама ў яе канфіскавалі каробку з крэйдай у якасці доказу правапарушэння.
Пры гэтым сама дзяўчына ў паліцыі і пазней у судзе заявіла, што яе надпіс азначаў «Нет вобле», бо яна «адчувае непрыязнасць да гэтага віду рыб». Суд адзначыў, што паліцыя ніяк не абвергла гэтую заяву і спыніў справу за адсутнасцю складу адміністрацыйнага правапарушэння.
Таксама суддзя пастанавіў вярнуць дзяўчыне яе каробку з крэйдай.