FT: Ukraina moža ŭziać Chierson užo na nastupnym tydni
Chiersonski haŭlajtar prosić dapamohi Rasii ŭ evakuacyi mirnych žycharoŭ. Heta śviedčyć pra toje, što ŭkraincy blizkija da deakupacyi rehijona, piša FT.
14.10.2022 / 11:00
Za apošnija tydni ŭkrainskija vojski prasunulisia na paŭdniovym froncie, viarnuŭšy častku akupavanaj Chiersonščyny.
Ukrainskaja armija prarvała rasijskuju liniju frontu pad Chiersonam na pačatku miesiaca, pryznała ŭ toj čas Ministerstva abarony Rasii, što stała samym bujnym prasoŭvańniem Ukrainy na poŭdni z pačatku poŭnamaštabnaha ŭvarvańnia Maskvy ŭ lutym. Z taho času Ukraina advajavała značnyja terytoryi na zachad ad Dniapra.
Paŭdniovaje apieratyŭnaje kamandavańnie Ukrainy ŭ čacvier zajaviła, što vyzvaliła z-pad kantrolu Rasii jašče piać nasielenych punktaŭ u Chiersonskaj vobłaści i źniščyła rasijski punkt kiravańnia i dźvie buksirujemyja haŭbicy.
Pavodle acenak zachodnich vajskoŭcaŭ, Ukraina moža ŭziać Chierson da Dniapra ŭžo na nastupnym tydni.
Haŭlajtar vobłaści Salda skazaŭ, što evakuacyja była pryznačanaja dla abarony ludziej ad abstrełaŭ, i dadaŭ, što ŭ centry ŭvahi byli siemji ź dziećmi, jakija źjeduć «adpačyć i vučycca».
Zaklik ab dapamozie ŭ evakuacyi siemjaŭ pakazvaje, što Rasija, mahčyma, rychtujecca da vyrašalnaj bitvy za horad.