Парламент Малдовы стварыў групу падтрымкі дэмакратычнай Беларусі
20 кастрычніка парламент Малдовы стварыў групу падтрымкі дэмакратычнай Беларусі, піша newsmaker.md. У яе ўвайшлі 19 дэпутатаў кіруючай праеўрапейскай партыі «Дзеянне і салідарнасць». Кіраваць ёй будзе дэпутатка Марына Марозава.
20.10.2022 / 22:14
Адна з акцый у падтрымку дэмакратычнай Беларусі ў Кішынёве. Фота: noi.md
Мэтай стварэння групы называецца паглыбленне дыялогу паміж парламентам Малдовы і дэмакратычным рухам Беларусі. Таксама парламентарыі Малдовы «пацвердзілі сваю прыхільнасць да прасоўвання дэмакратычных каштоўнасцяў і абароны асноўных правоў і свабодаў чалавека». Раней падобныя групы падтрымкі з'явіліся ў парламентах Латвіі, Эстоніі, Украіны.
На пасяджэнні парламента Малдовы прысутнічаў Анатоль Лябедзька, прадстаўнік Святланы Ціханоўскай па канстытуцыйнай рэформе і супрацоўніцтве з парламентскай супольнасцю.
Апазіцыя ў парламенце Малдовы (камуністы і сацыялісты) у галасаванні па стварэнні групы не ўдзельнічалі, «каб не сапсаваць адносіны з Беларуссю». Але яна была ў меншасці, таму не змагла ніяк паўплываць на рашэнне.
Усяго ў складзе парламент Малдовы — 101 дэпутат, з іх 63 цяпер належаць да фракцыі «Дзеянне і салідарнасць».