Міністр абароны Украіны растлумачыў, чаму запаволіўся наступ УСУ на поўдні
Прасоўванне Узброеных сіл на поўдні Украіны замарудзілася з-за дажджоў, аднак украінскія абаронцы працягваюць вызваляць тэрыторыі, заявіў міністр абароны Аляксей Рэзнікаў у інтэрв'ю Fox News.
26.10.2022 / 11:24
Фота: AP
«На поўдні мы таксама працягваем нашу контрнаступальную кампанію. Цяпер некаторыя ўмовы надвор'я, я маю на ўвазе дождж, запавольваюць нас. Але мы выкарыстоўваем тактыку крок за крокам вяртаць нашы вёскі, метры і кіламетры, і мы будзем працягваць рабіць гэта», — сказаў Аляксей Рэзнікаў.
Міністр лічыць, што акупанты не рызыкнуць праводзіць вулічныя баі ў Херсоне, таму што УСУ кантралююць масты цераз Дняпро, па якіх расейцы маглі б адступіць.
«Мы кантралюем усе масты цераз Дняпро, выкарыстоўваючы такія амерыканскія комплексы, як HIMARS, а таксама іншыя РСЗА, як M270, артылерыю 155-мм калібра — усё гэта сучасныя сістэмы стандарту НАТА, як, напрыклад, M777 з ЗША. Для іх заставацца ў Херсоне — гэта рэальная рызыка, таму што ў іх не будзе магчымасці збегчы, як яны зрабілі на Харкаўскім кірунку, напрыклад у Ізюме і іншых гарадах», — паведаміў Рэзнікаў.