U Homieli asudzili za kamientar pa spravie Zielcera hruzčyka, jaki ŭ 2020-m padtrymlivaŭ Łukašenku
Hruzčyk homielskaha vinzavoda Dźmitryj Małašanka ŭpieršyniu mieŭ prablemy z zakonam. Jon nie tolki nie pryciahvaŭsia i nie ŭdzielničaŭ ni ŭ jakich palityčnych pratestach suprać isnaj ułady, a navat naadvarot — udzielničaŭ u viełaprabiehu ŭ padtrymku Łukašenki i prymaŭ udzieł u jakaści družyńnika ŭ svoj vychodny dzień na vybarach u 2020 hodzie. Mužčyna na sudzie ščyra nie razumieŭ, za što jaho sudziać, piša «Homielskaja viasna».
31.10.2022 / 19:41
Andrej Zielcer sa strelbaj sustrakaje siłavikoŭ. Skryn z videazapisu z kvatery prahramista
Pad sud Dźmitryj Małašanka trapiŭ za kamientary «ŭ krainie strašniej, čym u Samali» i «kali b była ŭ mianie strelba i da mianie łamalisia b takija ludzi, ja b taksama abaraniaŭ svoj dom, tolki b barykady zrabiŭ» pad pastom z videa zatrymańnia i zabojstva IT-śpiecyjalista Andreja Zelcera (u pabliku «Mocnyja naviny» ŭ sacyjalnaj sietcy «VKontaktie»).
Kamientary Dźmitryj pakinuŭ 29 vieraśnia 2021 hoda, a ŭžo 30 vieraśnia byŭ zatrymany supracoŭnikami KDB. Padčas dopytu ŭ KDB pad ciskam Małašanka daŭ pakazańni, što ŭśviedamlaŭ, chto hetyja ludzi na videa i što idzie zatrymańnie ŭzbrojenaha złačynca supracoŭnikami milicyi. Takim čynam, jamu vystavili abvinavačańnie pavodle art. 369-1 (dyskredytacyja Respubliki Biełaruś).
Padčas suda abvinavačany spačatku pryznaŭ vinu ŭ poŭnym abjomie, ale padčas pracesu vyśvietliłasia, što nasamreč mužčyna hladzieŭ tolki kavałak videa, bo «źbiraŭsia na pracu i śpiašaŭsia, navinu nie čytaŭ i ludziej, jakija ŭskryvali kvateru Zielcera, pryniaŭ za złačyncaŭ», tamu i napisaŭ taki kamientar.
Dźmitryj Małašanka taksama nie pryznaŭ, što moh takim čynam dyskredytavać supracoŭnikaŭ orhanaŭ naohuł i kankretna tych, chto pranikaŭ u kvateru, a «prosta vykazaŭ svajo asabistaje mierkavańnie», na što «maje prava».
Sudovaja ekśpiertyza dała infarmacyju, što kamientary nie raspalvajuć varožaści i nie majuć pabudžalnaha charaktaru dziejańniaŭ, ale ŭ toj ža čas u ich vyjaŭlajecca niehatyŭnaja acenka palityčnaj situacyi ŭ krainie ŭ cełym i niehatyŭnaja acenka prafiesijnych dziejańniaŭ supracoŭnikaŭ orhanaŭ u pryvatnaści.
U vyniku prakuror Kanstancin Šapačkin zapatrabavaŭ pryznać Dźmitryja Małašanku vinavatym i zapytaŭ 2 hady pazbaŭleńnia voli i 100 bazavych vieličyniaŭ štrafu z kanfiskacyjaj telefona. Suddzia Jaŭhien Šaršnioŭ padtrymaŭ patrabavańni prakurora ŭ poŭnym abjomie.