Machlarstva sa startapam Theranos. Dla eks-miljarderšy Elizabiet Chołms patrabujuć 15 hadoŭ turmy
Dziaržabvinavačańnie pastanaviła, što 180 miesiacaŭ turemnaha źniavoleńnia budzie spraviadlivym pakarańniem dla Elizabet Chołms za jaje maštabnaje machlarstva sa startapam Theranos, jaki prapanoŭvaŭ tanny i chutki analiz kryvi, piša RBK.
12.11.2022 / 15:37
Fota: AP
Miniust ZŠA zapytaŭ dla zasnavalnicy startapa Theranos Elizabet Chołms pakarańnie ŭ vyhladzie 15 hadoŭ pazbaŭleńnia voli i vypłaty $800 młn padmanutym inviestaram, pieradaje Reuters. Vyniasieńnie prysudu zapłanavana na nastupny tydzień.
«Uličvajučy maštabnaść machlarstva Chołms, 180 miesiacaŭ turemnaha źniavoleńnia adlustroŭvali b surjoznaść złačynstva i strymali b Chołms i inšych», — havaryłasia ŭ zajavie prakuroraŭ.
Chołms raniej paprasiła akruhovaha suddziu Edvarda Daviłu nie pazbaŭlać jaje voli. U studzieni prysiažnyja pryznali jaje vinavataj pa čatyroch punktach abvinavačvańnia ŭ machlarstvie i zmovie, pa kožnym punkcie hraničny termin pazbaŭleńnia voli roŭny 20 hadam.
Chołms zasnavała kampaniju Theranos u 2005 hodzie ŭ jakaści bijatechnałahičnaha startapa. Jana śćviardžała, što raspracavała technałohiju, jakaja dazvalała atrymać dakładny analiz kryvi ŭsiaho ź niekalkich kropiel, što rabiła praceduru chutkaj, tannaj i biazbolnaj. Chołms stała samaj maładoj žančynaj-miljarderam, u 2015 hodzie Forbes acaniŭ jaje bahaccie ŭ $4,5 młrd (joj na toj momant byŭ 31 hod). Biznesvumen naležała pałova akcyj Theranos, rynkavaja kapitalizacyja samoj kampanii na toj momant aceńvałasia ŭ $9 młrd.
Praź niekalki miesiacaŭ paśla pracy startapa kłijenty stali masava skardzicca na pryłady Theranos, ich vyniki mieli zanadta vialikuju dolu pamyłak. Dla likvidacyi chibaŭ Theranos była vymušana pravodzić paralelnyja analizy tradycyjnym sposabam.
Paźniej stała viadoma pra toje, što technałohija praviadzieńnia analizu kryvi, pra jakuju pieršapačatkova kazała Chołms, była padroblenaj. 15 sakavika 2018 hoda Chołms vystavili abvinavačvańni ŭ machlarstvie.
Ciapier Forbes aceńvaje košt aktyvaŭ biznesvumen ŭ $0.