Prapahandystka Bondarava atakavała muziej Anatola Biełaha ŭ Starych Darohach, jość straty
Praŭładnaja aktyvistka z Hrodna, kiraŭnica dźviuch praŭładnych inicyjatyŭ «Infośpiecnaz» i «Antivandał» Volha Bondarava paviedamiła pra paśpiachovuju ataku na pryvatny muziej Anatola Biełaha ŭ Starych Darohach. Pry padtrymcy prarasijskich vysokapastaŭlenych čynoŭnikaŭ i byłych dy dziejnych supracoŭnikaŭ KDB joj udałosia dabicca źniščeńnia častki ekspanataŭ, paviedamlaje «Radyjo Svaboda».
16.11.2022 / 18:43
Bondarava nazvała biusty i bareljefy słavutym biełarusam, pastaŭlenyja pierad budynkam muzieja, «rusanienaviśnickaj i pranacysckaj ekspazicyjaj» i paskardziłasia rajonnamu ideołahu Uładzimiru Dzieviacieniu. Adnak toj, pa słovach prapahandystki, «pastaviŭ na paŭzu» spravu ŭ raźbiralnictvie ź biustami i bareljefami, jakija zdalisia Bondaravaj niedarečnymi.
Jana paviedamiła, što, dziakujučy supracoŭnictvu z uładami, ź miemaryjalnaj zony pierad budynkam muzieja byli prybranyja partrety paetki Natalli Arsieńnievaj, bratoŭ Łuckievičaŭ, Kastusia Kalinoŭskaha, dziejačaŭ BNR i BCR.
Na videa, źniatym u Starych Darohach, možna ŭbačyć źniščany biust Łarysy Hienijuš, a na pastamient pastavili inšy, mienšy pamierami, praŭdapadobna — Jakuba Kołasa. Taksama źniščana jašče niekalki bareljefaŭ, a niekatoryja, jak zajaŭlajecca, «pravierać historyki».
Źniščany biust Łarysy Hienijuš, časova zamienieny na inšy
Adnym z tych, chto paŭpłyvaŭ na źniščeńnie asobnych biustaŭ i bareljefaŭ u muziei, staŭ staršynia pastajannaj kamisii pa nacyjanalnaj biaśpiecy PPNS Aleh Biełakonieŭ. Toj samy vajskovy aficer, jaki paśla zabojstva supracoŭnika KDB Fiedasiuka ŭ 2021-m hodzie abiacaŭ žorstkija raspravy ź niazhodnymi, «100 za adnaho».
Źniščany bareljef u pamiać Natalli Arsieńnievaj
Taksama Bondarava padziakavała za źniščeńnie častki ekspazicyi padpałkoŭniku KDB u adstaŭcy Jemialjanu Lapiošku, Alaksandru Płavinskamu i «nieabyjakavym žycharam Starych Daroh i čynoŭnikam, jakija pažadali zastacca nienazvanymi».
«Na hety momant farmirujecca admysłovaja kamisija z pradstaŭnikoŭ navukovaj supolnaści», — adznačyła Bondarava.
Muziej u Starych Darohach
Vykładčyk BDU, krajaznaŭca, zasnavalnik i staršynia kulturna-aśvietnaha kłuba «Spadčyna» Anatol Bieły ŭ 1990-ja hady stvaryŭ u Starych Darohach pryvatny muziej historyi Biełarusi.
Na terytoryi baćkoŭskaj siadziby Anatol Bieły pabudavaŭ ceły muziejny kompleks, častka ekspanataŭ jakoha zachoŭvajecca i pad adkrytym niebam, u aharodzie na pryvatnaj terytoryi. Usiaho ŭ muziei vosiem załaŭ, ekspanaty — samyja roznyja: ad tvoraŭ mastactva i biustaŭ słavutych biełarusaŭ da miedaljonaŭ i haziet emihrantaŭ. Zachoŭvajecca tut vielmi šmat rečaŭ, padoranych Anatolu Biełamu, artefaktaŭ, źviazanych ź pieryjadam najnoŭšaha biełaruskaha Adradžeńnia.
Asobnaja ekspazicyja pryśviečanaja zmaharam za Biełaruś, asobnaja — aśvietnikam, jość i piersanalnyja ekspazicyi. Paśla śmierci ŭ 2011 hodzie Anatola Biełaha raźvićciom muzieja zajmalisia jahonaja žonka Ała i stryječny brat Michaił.