Maksim Bahdanovič. Jak na čužynie za 25 hadoŭ žyćcia stać ulubionym paetam Biełarusi. Novaje VIDEA na kanale Andreja Chadanoviča
Novy hieroj videa na kanale Andreja Chadanoviča — kłasik biełaruskaj litaratury Maksim Bahdanovič, jaki padaryŭ nam nievierahodny himn, navučyŭ śpiavać ramansy, čytać saniety i prymusiŭ vieryć, što Vieniera — heta zorka, jakaja ŭzychodzić nad ziamloju.
07.12.2022 / 17:59
U hetym videa Andrej Chadanovič raskazvaje:
- jak praz Nižni Noŭharad i Jarasłaŭl Bahdanovič pryjšoŭ da Biełaruščyny;
- čamu «Vianok» — hałoŭnaja kniha biełaruskaj paezii;
- jak kazki prababuli adkryli paetyčny talent Bahdanoviča;
- čamu paet pisaŭ šmat vieršaŭ pra kachańnie pa-rusku i jakija ź ich na biełaruskuju movu pierakłaŭ Andrej Chadanovič;
- jakija paetyčnyja adkryćci pryŭnios kłasik u biełaruskuju litaraturu;
- čym adroźnivajecca paezija Kołasa i Bahdanoviča.
Voś niekalki dumak z videa:
Jość u nas biełarusy, jakija lubiać znachodzić tysiaču pryčyn, čamu nie razmaŭlajuć pa-biełarusku. Naprykład, takuju: bo navokał nie razmaŭlajuć, albo tak: matčyna mova ŭžo rasijskaja, bo rusifikacyja i hetak dalej, abo lubimaje: nie chaču rabić svajoj niedaskanałaj movaj pamyłak i abražać tych, chto heta robić lepiej.
Usie hetyja arhumienty raźbivajucca ŭ druzački, kali ŭjavić adnu našu znakamituju postać — heta Maksim Bahdanovič, jaki bolšaść žyćcia pravioŭ nie ŭ Biełarusi, jaki naradziŭsia ŭ ruskamoŭnaj siamji, a dziaŭčaty, jakich jon kachaŭ, nie razmaŭlali pa-biełarusku. Uiavicie, što było b, kali b Bahdanoviča heta spyniła?
Sama naša historyja, našy mirnyja pratesty, našy spantannyja śpievy ŭ dvarach i inšych publičnych miescach vynieśli na pieršaje miesca i zrabili himnam pieśniu Ščahłova-Kulikoviča na vierš Bahdanoviča «Pahonia». Mabyć, adzin z hałoŭnych na siońnia našych himnaŭ i hałoŭny bahdanovicki vierš.
Da dziaŭčat, jakich kachaje, Bahdanovič piša ruskamoŭnyja vieršy, choć časam i pa-biełarusku. I voś dziŭna, što na biełaruskaj movie vychodziać šedeŭry, a pa-rusku časam šarahovyja teksty, choć ruskuju movu Bahdanovič viedaŭ lepiej i čaściej joj karystaŭsia. Jość na śviecie paetyčnyja cudy, jakija dazvalali jamu lotać mienavita na kryłach biełaruskaj.
Maksim Bahdanovič nazaŭsiody zastaŭsia 25-hadovym. Jon pamiraŭ adzin daloka ad radzimy, ale prymusiŭ vieryć, što aŭtary knih nie byvajuć samotnymi. Paezija Bahdanoviča budzie žyć viečna, jak žyvie biełaruskaja litaratura i žyvie Biełaruś.
Hladzim razam novaje videa Andreja Chadanoviča, stavim padabajki, kamientujem i dzielimsia z siabrami i siabroŭkami.