Гадзіннікавы завод «Прамень» выпусціў навагоднюю калекцыю будзільнікаў з каляднай зоркай
Як расказаў аўтар ілюстрацый на будзільніку Кірыл Дзямешка ў каментары выданню CityDog.io, супрацоўніцтва з заводам «Прамень» — гэта вынік ягонай вытворчай практыкі на трэцім курсе.
15.12.2022 / 22:51
Фота: luch.official / Instagram
«Практыка прадугледжвала наяўнасць замоўцы. Дзякуючы нашай выкладчыцы Вользе Каржаневіч замоўцам выступіў «Прамень». Яна і вяла з перамовы з кампаніяй. Дарэчы, калі вы бачылі гадзіннікі, выпушчаныя «Праменем» да 100-годдзя БДУ, то іх дызайн распрацавала таксама яна.
Што датычыць ідэі, то першапачаткова нас падзялілі па тэмах, мне трапіліся «навагоднія гадзіннікі». Амаль адразу зразумеў, што хачу зрабіць нешта сваё і роднае, таму мой выбар быў зроблены на карысць Калядаў. Выбіраў паміж двума атрыбутамі: казой і каляднай зоркай».
Гадзіннік даступны ў сінім і чырвоным колерах і выкананы ў класічнай форме будзільніка. Кошт — 59 рублёў. Дарэчы, купіць яго можна не толькі ў фірмовых крамах, але і ў інтэрнэт-краме завода з дастаўкай па ўсім свеце.