Украіна атрымае першы транш дапамогі ад ЕС у памеры 3 млрд еўра
На гэтым тыдні Украіна атрымае тры з васямнаццаці мільярдаў еўра, абяцаных Кіеву Еўрасаюзам у якасці макрадапамогі, паведаміў у панядзелак прэм'ер-міністр Украіны Дзяніс Шмыгаль.
16.01.2023 / 15:26
Ён адзначыў, што гэтыя сродкі неабходныя Украіне для падтрымання макрафінансавай стабільнасці.
Мемарандум аб прадастаўленні ЕС пакета агульным аб'ёмам 18 млрд еўра падпісаў віцэ-прэзідэнт Еўракамісіі Валдзіс Дамброўскіс.
«Гэта дазволіць Украіне закрыць самыя надзённыя патрэбы, маючы стабільнае паступленне сродкаў на працягу года», — заявіў ён.
Даты, на якія запланаваны іншыя траншы, не называюцца.
Узгадненне дадзенага пакета далося краінам ЕС няпроста. У прыватнасці, Венгрыя доўга выступала супраць.
Прыйсці да пагаднення блоку ўдалося ў сярэдзіне снежня 2022 года.