Aryštavali i sudziać taho samaha mytnika, jaki zatrymlivaŭ Čudziancova
Jak stała viadoma «Našaj Nivie», brescki mytnik Mikałaj Šynharej, jaki staŭ viadomy ŭ 2019-m hodzie praz aryšt Uładzimira Čudziancova, sam akazaŭsia za kratami. Jamu pahražaje da 10 hadoŭ.
23.02.2023 / 16:55
Mikałaj Šynharej, fota z sacsietak
Pry kancy 2019-ha hoda ŭ Breście z ciahnika na Varšavu źniali žurnalista z nieadnaznačnaj reputacyjaj Uładzimira Čudziancova, jaki potym atrymaŭ piać z pałovaj hod pazbaŭleńnia voli.
Pryčynaj dla aryštu stała nibyta znojdzienaja ŭ sumcy Čudziancova marychuana. Hramadstva ŭ hetaj viersii zasumniavałasia paśla taho, jak stała viadoma, što Čudziancoŭ byŭ aŭtaram i sustvaralnikam telehram-kanała «Niechta». A taksama starejšym siabram i mientaram Ściapana Puciły.
Zatrymlivaŭ Čudziancova brescki mytnik Mikałaj Šynharej.
Paśla publikacyi jaho imieni na Šynhareja nakinulisia tyja, chto padtrymlivaŭ Čudziancova. U razmovie z žurnalistam «Našaj Nivy» Šynharej tady skazaŭ, što sumlenna vykanaŭ svaju rabotu i admaŭlaŭ usie abvinavačvańni ŭ tym, što jon niešta padkinuŭ.
Jak by tam ni było, praz try hady hety mytnik sam akazaŭsia na łavie padsudnych. Učora ŭ Breście nad im pačaŭsia sud. Jak stała viadoma, Šynhareja sudziać pa artykułach 426 č. 2 (pieravyšeńnie ŭłady abo słužbovych paŭnamoctvaŭ), art. 333 č. 1 i č. 2, a taksama art. 333 č. 1 prym. 1 (niezakonny abarot rečyvaŭ mocnaha dziejańnia abo atrutnych rečyvaŭ, abo radyjeaktyŭnych materyjałaŭ, zbroi i bojeprypasaŭ, inšych vidaŭ uzbrajeńniaŭ i vajskovaj techniki praz mytnuju miažu JeAES abo RB).
Mytniku pahražaje da 10 hadoŭ pazbaŭleńnia voli.