У розных раёнах краіны з раніцы стаяць пасты ДАІ, правяраюць машыны
Пасля падрыву каштоўнага расійскага самалёт А-50 у Мачулішчах, сілавікі працягваюць пошукі датычных да дыверсіі.
27.02.2023 / 10:49
Панарама з карты
«Мотолько Помогі» паведамляе, што на бягучы момант пасты ДАІ стаяць у:
— Ганцавічах;
— раёне Мачулішчаў;
— Пінскім раён (траса Р-147);
— Барысаўскім раёне (траса Р-53, паміж Жодзіна і Барысавам);
— Столінскім раёне (в. Беражное).
Па Пінскім раёну, уздоўж трасы Р-147, якая вядзе да КПП «Невель», пасты ў кожнай вёсцы, ездзіць ДАІ. Ёсць як ваенныя, так і міліцыя. Людзей спыняюць і даглядаюць.
Учора «Наша Ніва» паведамляла, што пагранічнікі ўзмацнілі ахову граніцы. Лукашэнкаўцы лічылі, што дыверсію ажыццявіла ўкраінская дыверсійна-разведвальная група, якая зайшла на тэрыторыю Беларусі.
«Нагналі людзей, пільнуем кожны кіламетр, каб не даць вярнуцца ва Украіну меркаванай ДРГ», — ананімна паведаміў «Нашай Ніве» суразмоўца з Пагранічнага камітэта.
Канал «Беларусі за МКАДам» дапаўняе, што ўзмоцненыя патрулі ДАІ і ваенных з аўтаматамі, выстаўлены і ў Столінскім раёне, у раёне вёскі Беражное ў 30 кіламетрах ад мяжы з Украінай.
Нагадаем, учора ранкам каля 9-й раніцы на аэрадроме былі чутныя два выбухі. Паведамлялася, што пацярпеў вельмі каштоўны расійскі самалёт далёкай разведкі ДРЛВ А-50, ён быў падарваны ў двух месцах. Усяго такіх самалётаў у Расіі, спраўных і няспраўных, дзевяць. Ён выкарыстоўваўся для навядзення расійскіх ракет на цэлі ва Украіне.
Кіраўнік аб’яднання Bypol Аляксандр Азараў паведаміў, што расійскі самалёт А-50 атакавалі з паветра. Напад з дапамогай двух дронаў учынілі ўдзельнікі плана «Перамога», яны цяпер у бяспецы.