«Heta čarhovy fejk»: pradstaŭnik MZS Biełarusi prakamientavaŭ vybuchi ŭ Mačuliščach
«Chočuć pakazać, niby ŭ nas jość pravały u nacyjanalnaj biaśpiecy».
28.02.2023 / 17:42
Namieśnik ministra zamiežnych spraŭ Biełarusi Juryj Ambrazievič (źleva) padčas vizitu ŭ Žienievu. Fota: MZS Biełarusi
Namieśnik kiraŭnika MZS Biełarusi Juryj Ambrazievič na druhi dzień svajho vizitu ŭ Ženievu dla sustrečy z pradstaŭnikami Arhanizacyi Abjadnanych Nacyj prakamientavaŭ situacyju vakoł rasijskaha samalota A-50 na aeradromie ŭ Mačuliščach.
Jon skazaŭ, što infarmacyja pra jaho paškodžańnie biełaruskimmi padpolščykami heta «čarhovy fejk».
«Uličvajučy adsutnaść aficyjnaj reakcyi, ja hłyboka pierakanany, što heta zjaŭlajecca čarhovaj falšyvaj zajavaj, paklikanaj padkreślić peŭnyja pravały ŭ našaj nacyjanalnaj biaśpiecy», — zajaviŭ ahienctvu Reuters Juryj Ambrazievič.
Jak adznačyła ahienctva, nijakich dokazaŭ svajoj pazicyi biełaruski čynoŭnik nie pryvioŭ.
Nahadajem, što 26 lutaha zjaviłasia navina ab udary dronaŭ pa redkim i vielmi kaštoŭnym rasijskim samalocie dalniaj raźviedki A-50, ź jakoha ažyćciaŭlałasia naviadzieńnie rasijskich rakiet i dronaŭ na celi va Ukrainie i jaki bazavaŭsia na biełaruskim aeradromie ŭ Mačuliščach. Jak zajaviŭ kiraŭnik inicyjatyvy siłavikoŭ suprać dyktatury «Bajpoł» Alaksandr Azaraŭ, hetuju dyviersiju pry dapamozie dronaŭ ździejśnili biełaruskija padpolščyki, udzielniki płana «Pieramoha».
Aficyjny Minsk pakul nie kamientavaŭ hetaj situacyi, adnak biełaruskija siłaviki naviedvajuć i dapytvajuć uładalnikaŭ dronaŭ, z 26 lutaha ŭzmocniena dahladajuć uvieś transpart na vyjeździe z Biełarusi, u tym liku ŭ Rasiju, i vypuścili aryjenciroŭku na čałavieka, «jaki moža być datyčny da złačynstva, ździejśnienaha 26 lutaha ŭ h.p. Mačuliščy».