Іркуцкія мабілізаваныя публічна звярталіся да Пуціна і губернатара, але іх усё адно адправілі на штурм
Іркуцкіх мабілізаваных 1 сакавіка адправілі на штурм аўдзееўскага ўмацаванага раёна. Тры дні таму губернатар Ігар Кобзеў паабяцаў, што «хлопцаў перавядуць на новае месца службы», піша выданне «Людзі Байкала».
01.03.2023 / 10:29
Скрын відэа
Пра штурм выданню распавялі самі мабілізаваныя, гэта пацвердзілі іх сваякі. «Адправілі 1-ы і 2-і батальёны, — распавялі вайскоўцы. — Мы чакалі пераводу [ў тэрабарону], але нас нікуды не пераводзяць».
У лютым іркуцкія вайскоўцы з палка 1439 запісалі відэазвароты да Уладзіміра Пуціна і губернатара Ігара Кобзева.
Мабілізаваныя заявілі пра «беззаконныя і злачынныя загады камандавання», якое сфармавала з іх штурмавыя падраздзяленні і адправіла на смерць. Трэці зварот вайскоўцаў іх жонкі адправілі ў анлайн-прыёмную Галоўнай вайсковай пракуратуры.
26 лютага губернатар Ігар Кобзеў паабяцаў, што «найбліжэйшым часам хлопцаў перавядуць на новае месца службы». У Telegram-канале ён запэўніў, што трымае сітуацыю на кантролі.
— Наогул нічога не змянілася, хоць мы вельмі спадзяваліся, — распавялі іркуцкія мабілізаваныя.