На пункце пропуску «Каменны Лог» фура ўрэзалася ў рэйсавы аўтобус
Увечары 10 сакавіка фура ўрэзалася ў рэйсавы аўтобус на пункце пропуску «Каменны Лог», што на беларуска-літоўскай мяжы. Пра гэта напісала выданне Tochka.by, якому відэа з месца здарэння даслалі чытачы.
11.03.2023 / 18:39
Паколькі на борце аўтобуса была бачная сімволіка «Мінсктранса», то рэдакцыя выдання звязалася з перавозчыкам і даведаліся дэталі здарэння.
Рэйсавы аўтобус ехаў з Вільні ў Мінск, з літоўскай сталіцы ён выехаў у 16:00. Пасля таго, як здарылася гэта ДТЗ, усіх пасажыраў давезлі да Мінска на падменным транспарце. Сам аўтобус атрымаў лёгкія пашкоджанні і сваім ходам дабраўся да базы. Ніхто ў аварыі не пацярпеў.
У «Мінсктрансе» ўдакладнілі, што вінаваты ў ДТЗ кіроўца фуры.
«Віна не нашага аўтобуса. Усіх пасажыраў перасадзілі і давезлі да канчатковага пункта руху. Аўтобус, які трапіў у ДТЗ, паспяхова вярнуўся ў Мінск сваім ходам», — сказала прэс-сакратарка ГП «Мінсктранс» Алена Грамыка.