Для эксперткі па этыкеце Зарэцкай і рэкламіста Караўца запрасілі пакаранне ў выглядзе калоніі
Суд над эксперткай па этыкеце Аксанай Зарэцкай і ўладальнікам фірмы Astronim Багданам Караўцом пачаўся 10 сакавіка. Сёння дзяржабвінавачанне запрасіла ім пакаранне.
14.03.2023 / 15:01
Зарэцкай запрасілі паўтара года калоніі, Караўцку — два гады калоніі.
Іх судзяць разам і абвінавачваюць па «народным» артыкуле за «актыўны удзел ці арганізацыю дзеянняў, што парушаюць грамадскі парадак», піша тэлеграм-канал Каардынацыйнай рады.
У абодвух ёсць непаўналетнія дзеці.
Падчас судовых спрэчак адвакат падсудных падкрэсліла, што парушэнне закону, якое інкрымінуюць Аксане і Багдану адбылося больш за 2 гады таму. З таго часу абвінавачаныя ніякіх законаў не парушалі, працавалі на карысць краіне і не пераехалі, нягледзячы на такую магчымасць. У якасці змякчальных абставінаў абаронца таксама давяла сямейныя складанасці ў абодвух абвінавачаных.
У бацькі Аксаны Зарэцкай праблемы са здароўем, Багдан выхоўвае дзіця з інваліднасцю. Таксама ў якасці хадайніцтваў да пісьмовых матэрыялаў справы былі далучаны шматлікія станоўчыя характарыстыкі на абодвух абвінавачаных з розных месц працы.
У сваім апошнім слове Аксана Зарэцкая папрасіла прабачэння ў сям’і за тыя выпрабаванні, якія ім давялося вытрымаць у сувязі з яе пазбаўленнем волі.
«Я думала, што магу перажыць любое пакаранне, але развітанне з роднымі і іспыты для блізкіх — самае складанае», — адзначыла Аксана.