Pajšoŭ biarozavik i klanovik. Raskazvajem, dzie i pačym jaho pradajuć lashasy
Najtańniejšy biarozavy sok u Homieli i Hrodnie. Najdaražejšy ŭ Minsku i na Viciebščynie. Nie tanny jon i na Brestčynie. Biudžetnuju canu abiacajuć vystavić za biarozavik na Mahiloŭščynie.
23.03.2023 / 17:41
Leśniki źbirajuć biarozavik
Najdaražejšy biarozavik u Minsku
Na zachadzie i poŭdni lashasy ŭžo pačali źbirać biarozavik. Jak kažuć leśniki, intensiŭnaść sokavydzialeńnia zaležyć ad nadvorja. Plusavaja tempieratura spryjaie bolšamu pradukavańniu biarozami ŭlublonaha biełarusami napoju. Minusavaja ž zapavolvaje praces ci naahuł jaho spyniaje.
«Ciapier dzionnaja i načnaja tempieratura trymajucca vyšej za nul, to sok idzie. Ale, pavodle prahnozaŭ, na nastupnym tydni čakajecca minus 9, tamu, zrazumieła, jon spynicca. U nas usio padrychtavana dla prodažu, ale my čakajem dobrych pahodnych umovaŭ», — paviedamili ŭ adnym ź laśnictvaŭ Hrodzienščyny.
Pradavajuć pieršy biarozavik stali i na Minščynie.
U stalicy jaho možna prydbać na vulicy Bahracijona, 70.
Tut za litr paprosiać 49 kapiejek, kali čałaviek sa svajoj taraj. Kali jaje niama, to prapanujuć 5-litrovuju butelku za 4 rubli 61 kapiejku.
U samim laśnictvie litr soku abydziecca tańniej — za 37 kapiejek. Za hetuju ž canu pradaduć biarozavik i ŭ inšych rajonnych laśnictvach vobłaści.
Klanovy sok. Fota: forestry.by
Staličny lashas pačaŭ pradavać i klanovy sok. Piać litraŭ klanovika ŭ PET-butelcy kaštuje 7 rubloŭ 14 kapiejek. Pradajuć taki sok u Minsku na vulicy Bahracijona, 70.
Hrodna: tańniej i bolš miescaŭ prodažu
Prodaž biarozavika ŭ Hrodnie. Fota ilustracyjnaje
U hrodzienskim lashasie zapeŭnivajuć: ceny na biarozavik zastajucca na ŭzroŭni minułaha hodu.
U kantory lashasa, jakaja mieścicca ŭ vioscy Bahušoŭka, cana litra biarozavaha soku — 23 kapiejki.
U abłasnym centry pryvazny z rajonaŭ biarozavik daražejšy — 25 kapiejek.
Pradajuć jaho na vulicy Fiestyvalnaj, 16a — heta administracyjny budynak haradzienskaha lashasa. Akramia taho, prydbać sok možna i na Paŭdniovym rynku (Indurskaja šaša, 30).
Pryčym lashas moža nalivać sok jak u taru kupca, tak i ŭ svaje dziesiacilitrovyja słoiki, za jakija treba dapłacić.
Brestčyna: čamu biarozavik daražej, čym u Hrodnie
Na Brestčynie prodaž biarozaviku startavaŭ 21 sakavika.
U abłasnym centry jaho možna prydbać na handlovaj placoŭcy lashasa — vulica Kobrynskaja, 53. Jaho cana vyšejšaja, čym u Hrodnie — 36 kapiejek za litr.
Biarozavik pradajuć i ŭ rajonnych laśnictvach prosta na miescy jaho źbirańnia. U takim vypadku jaho košt: 0,195 rubli za litr.
U Breście raźbiežku ŭ cenach z Hrodna tłumačać dadatkovymi vydatkami, źviazanymi z narychtoŭkaj i prodažam soku.
U košcie ŭličanyja zarobki pradaŭcoŭ dy apłata pasłuhaŭ naniatych lashasam dla źbirańnia soku rabotnikaŭ. U lasnasie kažu, što leśniki mohuć źbirać biarozavik tolki tady, kali ź imi lashas zaklučyŭ adpaviednuju damovu.
Akramia taho, u košt biarozaviku, dadajucca raschody na dezynfiekcyju bočak, ź jakich jaho pradajuć. Da taho ž, u adroźnieńnie ad Hrodnienščyny, Bresckaja vobłaść vyciahnutaja, biareźniki ž raźmieščanyja dalej ad abłasnoha centra, što pavialičvaje transpartnyja raschody.
Na Homielščynie biarozavik najtańniejšy
U rehijonie płanujuć sabrać za siezon 1 200 ton biarozaviku. Za pieršyja try dni miascovy lashas pradaŭ 20 ton soka nasielnictvu.
Prydbać jaho možna ŭ rajonnych laśnictvach. Vyhadniej budzie na dzialancy — za litar 17 kapiejek. U lashasie, jaki ŭ horadzie, užo — 25 kapiejek za litr.
Na Mahiloŭščynie i Viciebščynie siezon nie pačaŭsia
Letaś mahiloŭskija laśnictvy pačali zdabyvać sok napačatku krasavika.
«Biarozavik u čakańni. Pakul niama pahody dla jaho. Načnyja tempieratury byvajuć minusavyja», — davodziać leśniki.
U mahiloŭskim lashasie zapeŭnivajuć, što pradavać sok buduć pa cenach minułaha hodu. Letaś siaredniaja cana biarozavika z dzialanki była 20 kapiejek za litr, a sa składa lashasa — 26 kapiejek.
Na Mahiloŭščynie zabaroniena źbirać z-za radyjacyjnaha zabrudžańnia sok u Krasnapolskim rajonie.
U Viciebskaj vobłaści biarozavy sok taksama čakaje ciepłyni. Kali budzie adkryty siezon, leśniki peŭna skazać nie mohuć i prosiać udakładnić paśla 1 krasavika.
U laśnictvach biarozavik źbirajucca pradavać za 37 kapiejek za litr. U Viciebsku — za 42 kapiejki za litr, kali ŭ kupca budzie svaja tara. Kali jaje niama, to za 5 litrovuju butelku treba dapłacić 3,5 rubli.
Sioleta płany pa biarozaviku ściplejšyja
Letaś lashasy sabrali bolš za 12 tysiač ton biarozaviku. Čverć pradali spažyŭcam, astatniaje realizavali na pierapracoŭčyja pradpryjemstvy.
Sioleta havorka idzie pra ściplejšyja abjomy. Płanujuć nabrać biarozavika tolki 4 tysiačy ton.
U lashasach nahadvajuć, što samavolnaja narychtoŭka biarozaviku zakanadaŭča zabaronienaja.
«Ciapier takija štrafy, što vyhadniej kupić, čym ryzykavać», — adznačyŭ adzin ź leśnikoŭ.
Štraf dla fizičnaj asoby da 740 rubloŭ (da 20 bazavych vieličyniaŭ), dla pradprymalnika — da 3700 rubloŭ (da 100 bazavych vieličyniaŭ), a dla jurydyčnaj asoby — da 18500 (da 500 bazavych vieličyniaŭ).
Parušalnikaŭ buduć vykryvać supracoŭniki pryrodaachoŭnych struktur śpiecyjalnymi rejdami.
Dla tych chto choča sam nabrać biarozaviku varta źviarnucca ŭ laśnictvy. Tam pakažuć umyśla adviedzienyja dzialanki, śpiecyjalisty praviaduć instruktaž, jak pravilna źbirać sok i prakantralujuć technałohiju padsočvańnia.
Čytajcie taksama: