Талерка ў тэхніцы трафарэта. У Мінску праходзяць займальныя майстар-класы
Серыя майстар-класаў з удзелам вядомых майстроў народнай творчасці Беларусі праходзіць у Нацыянальнай бібліятэцы ў рамках выстаўнага праекта «Фарфоравае асарці».
24.03.2023 / 15:20
23 сакавіка можна было задэкарыраваць талерку ці любы посуд у тэхніцы трафарэта. І стаць уладальнікам унікальнага экспаната. Прыйсці мог любы ахвочы, праход на майстар-клас — білет на выставу «Фарфоравае асарці». Адзіная ўмова — узяць з сабой прадмет для дэкору, паведамляе агенцтва «Минск-Новости».
Ведам і вопытам дзялілася мастачка Наталля Керус. Яе працы можна ўбачыць на выставах, кірмашах аўтарскіх вырабаў «Млын», «Гарошак Маркет», «Сарафан».
Былі і тыя, хто ўжо прыходзіў на такі майстар-клас раней. Настолькі спадабаўся працэс і вынік, што вярнуліся, каб на гэты раз задэкарыраваць талеркі для яек у падарунак блізкім да Вялікадня. І паабяцалі наведаць наступны майстар-клас, дзе будуць распісваць яйкі ў тэхніцы пісанкі.
Нехта ствараў цэлыя наборы. Напрыклад, кружка і сподак у беларускім стылі.
— Як паказала практыка, людзі часцей за ўсё выбіраюць менавіта трафарэты з беларускім арнаментам, сімволікай, а таксама з выявай васілька. Што да кветак, тое гэта ўльтрамарын, сіненькі, белы, чырвоны і васільковыя адценні, а яшчэ вялікай папулярнасцю карыстаецца залаты колер, асабліва на чорным фоне ці на цёмна-сінім, — падзялілася назіраннямі Керус.
Неабавязкова было прыходзіць з новым посудам, прыходзілі і са старымі талеркамі, якія ўжо надакучылі, і гаспадары вырашылі даць ім другое жыццё. У выніку атрымалася новая дызайнерская, стыльная талерка.
Майстар-клас не мае абмежаванняў па ўзросце. За адным сталом сабраліся бабуля з унучкай, маладыя дзяўчаты, тры актыўныя сяброўкі-пенсіянеркі… І абсалютна ў кожнага сваё бачанне, сваё спалучэнне ліній, узораў і кветак.
Самае частае пытанне настаўніцы: а ці можна з такога посуду есці? На што мастачка адказвае:
— Усё залежыць ад месца, дзе наносяць малюнак. Калі гэта шкляная талерка, і мы робім роспіс праз трафарэт са зваротнага боку, а вонкавы бок, з якой ямо, застаецца некрануты, то такой талеркай можам спакойна карыстацца. А вось калі наносіць фарбу на гэты бок посуду, то малюнак трэба абавязкова пакрыць гіпаалергенным лакам, пасля чаго яна стане прыдатная для прадуктаў.
А яшчэ мастачка расказала, што задэкарыраваць талерку ў тэхніцы трафарэта можа любы, нават той, хто ніколі пэндзлікі ў руках не трымаў. Дастаткова мець губку, фарбы і трафарэт. Неабавязкова купляць акрылавыя ці алейныя фарбы, можна выкарыстоўваць гуаш, адзінае, што пасля высыхання яна можа пацямнець. Можна браць як керамічны посуд, неглазіраваны, так і эмаляваныя, шкляныя і парцалянавыя прадметы, толькі на іх папярэдне трэба нанесці любую грунтоўку.
Наступнай тэмай майстар-класаў, якія адбудуцца 6 і 13 красавіка, стане роспіс абярэгавых яек у тэхніцы пісанкі з майстрам народнай творчасці Ганнай Клімовіч. Затым 10 і 17 красавіка Вольга Хачкоўская запрашае навучыцца роспісу яек воскам у тэхніцы пісанкі.
Чытайце таксама:
У Мінску адкрываецца выстава Захара Кудзіна
Мінкульт адмяніў кінафестываль «Нефільтраванае кіно» за два дні да пачатку