Dačku Kim Čen Yna zaŭvažyli ŭ kurtcy Dior za 2800 dalaraŭ
Dziaržaŭnyja SMI Paŭnočnaj Karei sfatahrafavali 10-hadovuju dačku lidara Paŭnočnaj Karei Kim Čžu E, kali jana prysutničała na čarhovym zapusku rakiety sa svaim baćkam Kim Čen Ynam na minułym tydni, paviedamlaje The Washington Post.
26.03.2023 / 19:38
Admietnyja romby puchavika Dior dobra bačnyja na fota z dačkoj Kim Čen Yna
Heta byŭ «Chvason-17», zdolny dasiahać ZŠA. Jak raniej zajaŭlaŭ Pchieńjan, rakieta pavinna prademanstravać «žorstkuju pazicyju ŭ adkaz» na vajskovyja vučeńni ZŠA i Paŭdniovaj Karei, jakija praciahvajucca.
U Pchieńjanie ŭsio jašče choładna, tamu Kim Čžu E apranuła čornuju ciopłuju kurtku. Paŭdniovakarejski kanał TV Chosun, zaŭvažyŭšy charakternyja romby na joj, paviedamiŭ, što jana vyhladaje sapraŭdy identyčna toj, što pradajecca francuzskim luksavym brendam Christian Dior. Heta kurtka z apošniaj kalekcyi i raźličanaja na dziaciej 10—12 hadoŭ. Cana — 2800 dalaraŭ.
Puchavik ź dziciačaj kalekcyi pradajecca za 2800 dalaraŭ
Jak havorycca ŭ apisańni madeli, hety puchavik ušanoŭvaje spadčynu Doma sa znakavym matyvam Cannage. Heta asablivaja vyšyŭka, jakaja składajecca z hieamietryčnaha malunka z kvadrataŭ i dyjahanalaŭ. Padobny malunak źjaŭlajecca na mnohich vyrabach Dior, asabliva časta na sumkach. Uzor byŭ naviejany kresłam Napaleona III.
Kresła Napaleona III, jakoje natchniła na stvareńnie kultavaha dla brenda ŭzoru
Puchavik vyrableny z čornaha vodaniepranikalnaha aksamitu, napoŭnieny pucham i pierjem.
Da minułaha listapada ŭłady KNDR nie pacviardžali najaŭnaść u lidara krainy dziaciej. Pavodle źviestak paŭdniovakarejskaj raźviedki, u ich z žonkaj Li Sol Čžu dźvie dački i syn — 2010, 2013 i 2017 hadoŭ naradžeńnia. Kim Čžu E — dziesiać hadoŭ. Apošnim časam Kim Čen Yn časta źjaŭlajecca z dačkoj na publičnych mierapryjemstvach.
Čytajcie taksama:
U KNDR pierajmianoŭvajuć ciozak dački Kim Čen Yna
Kim Čen Yn pahladzieŭ spartyŭnyja spabornictvy razam z dačkoj