U Minsku asudzili ajcišnika, jaki nibyta pahražaŭ načalniku HUBAZiKa
U sudzie Partyzanskaha rajona Minska 13 sakavika razhledžana kryminalnaja sprava hramadzianina Rasii, viadučaha inžyniera-prahramista adnaho z pradpryjemstvaŭ Ilji Šakirava. Jaho abvinavacili ŭ hvałcie albo pahrozie hvałtam u dačynieńni da supracoŭnika orhanaŭ unutranych spraŭ, byłoha načalnika HUBAZiKa MUS Dźmitryja Kovača (art. 364 KK), paviedamlaje «Viasna».
29.03.2023 / 13:02
Ilja Šakiraŭ
Sud pavinien byŭ razhladać i inšyja abvinavačańni, vystaŭlenyja Šakiravu: abrazu Alaksandra Łukašenki (č. 1 art. 368) i abrazu pradstaŭnika ŭłady (art. 369). Adnak materyjały pa hetych artykułach u pracesie nie razhladalisia.
Spravu razhladaŭ suddzia Alaksandr Supičenka.
Ilju Šakirava zatrymali 30 listapada 2022 hoda i da suda źmiaścili ŭ SIZA №1 Minska.
U praŭładnych telehram-kanałach praź niekalki dzion źjaviłasia videa, na jakim ajcišnika prymušajuć nazvać svoj vialiki zarobak, a taksama «pryznacca» ŭ tym, što jon pakidaŭ abraźlivyja kamientary pra supracoŭnikaŭ milicyi.
Pa materyjałach abvinavačańnia, Šakiraŭ u žniŭni 2022 hoda ŭ pryznanaj ekstremisckaj telehram-hrupie (čacie) naŭmysna pahražaŭ užyvańniem hvałtu ŭ dačynieńni da Dźmitryja Kovača i jahonych blizkich, raźmiaściŭšy kamientar, jaki źmiaščaje prykmiety vierbalnaj ahresii.
«Fakt daviadzieńnia pahrozy da viedama paciarpiełaha pacviardžajecca abvieščanymi pakazańniami paciarpiełaha. Pahroza prymianieńnia hvałtu prajaviłasia ŭ vykazvańni abvinavačanym namiery nanieści škodu žyćciu i zdaroŭju paciarpiełaha i jaho blizkim. Sudom taksama ŭličvajecca i abstanoŭka, jakaja skłałasia ŭ krainie, kali destruktyŭnymi siłami pravodzicca metanakiravanaja praca, nakiravanaja na ažyćciaŭleńnie dziaržaŭnaha pieravarotu», — paviedamlaŭ bok abvinavačańnia.
Dźmitryj Kovač taksama vystaviŭ patrabavańnie ab spahnańni materyjalnaj kampiensacyi maralnaj škody na sumu 2 000 rubloŭ.
Sud pakaraŭ Ilju Šakirava dvuma hadami kałonii.
Materyjalnuju kampiensacyju abvinavačany apłaciŭ dobraachvotna da pačatku sudovaha pracesu.