У Польшчы затрымалі арганізатара нелегальнай міграцыі з Беларусі
Супрацоўнікі падляшскага аддзялення польскай Памежнай аховы затрымалі ў адным з паселішчаў пад Варшавай 33-гадовага грамадзяніна Егіпта, які арганізоўваў незаконны пераход мяжы з Беларусі ў Польшчу.
31.03.2023 / 15:49
Фота: strazgraniczna.pl
Мужчына легальна жыве ў Польшчы ўжо сем гадоў. Яго падазраюць у тым, што ён дапамог арганізаваць пераход мяжы некалькім дзясяткам мігрантаў з Афганістана, Сірыі і Егіпта.
Ягоная роля заключалася ў арганізацыі перавозу мігрантаў ад мяжы з Беларуссю ў Заходнюю Еўропу. Паслуга каштавала ад 200 да 1000 еўра на чалавека.
Затрыманага змясцілі пад варту на два месяцы. Яму пагражае да васьмі гадоў турмы.
У гэтым годзе польскія памежнікі затрымалі 176 чалавек за арганізацыю пераходу мяжы мігрантамі і дапамогу ў гэтым. 58 з іх былі арыштаваныя. Летась быў затрыманы 401 памагаты.
Чытайце таксама:
Мігранты на беларуска-польскай мяжы кідаліся ў польскіх памежнікаў камянямі
Адновіцца авіязлучэнне з Іранам. Ці рызыкне Лукашэнка паўтарыць атаку мігрантамі?