Двух беларусаў арыштавалі ў Маскве і абвінавацілі ў падпале электравоза
У Мяшчанскі раённы суд Масквы паступілі хадайніцтвы аб падаўжэнні арышту Арцёму Брэскаму і Кірылу Басько, якіх абвінавачваюць у дыверсіі (пункт «б» часткі 2 артыкула 281 КК РФ). Адпаведную інфармацыю ў базе маскоўскіх судоў выявіла выданне «Медыязона».
21.04.2023 / 21:57
Электравозы. Фота ілюстрацыйнае
Хадайніцтва аб працягу тэрміну ўтрымання пад вартай абвінавачаным разгледзіць суддзя Варвара Аганава 24 красавіка ў 15:30.
Па інфармацыі «Медыязоны», двух грамадзян Беларусі 2003 і 2004 гадоў нараджэння затрымалі 27 снежня 2022 года на станцыі Масква-Курская. Паводле версіі следства, 22 снежня яны за ўзнагароджанне падпалілі электравоз у лакаматыўным дэпо на станцыі Арэхава-Зуева.
Першапачаткова на затрыманых склалі пратаколы аб дробным хуліганстве (частка 1 артыкула 20.1 КаАП РФ). Па версіі паліцыі, яны мацюкаліся ў грамадскіх месцах. Абодвум маладым людзям 27 снежня Басманны раённы суд прызначыў штрафы.
Пазней маладых людзей арыштавалі па артыкуле аб наўмысным пашкоджанні маёмасці (Частка 2 артыкула 167 КК РФ). Затым абвінавачванне перакваліфікавалі на артыкул аб дыверсіі.