У Брэсце затрыманыя айцішнік і прадпрымальнік. Вось як іх адшукалі і як яны маглі б абараніцца
Мужчын вінавацяць у тым, што яны пакідалі каментары супраць вайны ва Украіне.
02.05.2023 / 19:41
Затрыманыя ў Брэсце — Ягор Дашэвіч і Аляксандр Заноўскі
У відэа ГУБАЗіК гаворка ідзе пра 28-гадовага прадпрымальніка з Пінска Ягора Дашэвіча і айцішніка з Брэста Аляксандра Заноўскага. Іх вінавацяць у каментарах, якія ў асноўным тычацца вайны ва Украіне — абодва мужчыны крытыкавалі дзеянні беларускіх уладаў.
Дашэвіч паходзіць з Пінску, з сям'і настаўнікаў. У дзяцінстве ён удзельнічаў у алімпіядах, а пасля паступіў у Пінскі педагагічны каледж. Цяпер займаецца пісьмовым і вусным перакладам на замову.
Заноўскі з Брэста, займаецца распрацоўкай сайтаў. Згодна з інфармацыяй сайта Dissidentby, мужчына ў СІЗА-7 у Брэсце з 10 сакавіка 2023 года. Яго вінавацяць у «абразе Лукашэнкі».
Акаўнты абодвух мужчын створаныя даўно і называліся іхнімі імёнамі. Такім чынам, губазіказікаўцам, выглядае, было нескладана адшукаць мужчын.
Дык як абараніцца ад такой дэананімізацыі?
Варта запомніць агульныя правілы, якія дазволяць ускладніць вашу дэананімізацыю:
- Калі вы не памятаеце, ці называўся акаўнт вашымі сапраўднымі імем і прозвішчам, то вам варта выдаліць акаўнт і стварыць яго нанова.
- Калі ваш акаўнт створаны да 2020-га года, то-бок, да моманту, калі Telegram дадаў магчымасць хаваць нумар у пошуку, то варта змяніць акаўнт.
- Калі вы пісалі ў «Чорную кнігу Беларусі» (у перыяд з верасня 2020-га да ліпеня 2021-га) або ў боты «Беларусі галаўнога мозга» і «Нехты» (у сакавіку-маі 2021-га), то варта выдаліць ваш акаўнт і стварыць яго нанова.
- Калі вы стваралі пратэсныя стыкеры або Emoji, то лепш перастварыць ваш акаўнт — у выпадку затрымання гэта стане вядома.
- Калі ў вашых колах ёсць палітычна актыўныя людзі, то выдаляйце з імі ўсю перапіску і абмяркуйце, што не будзеце дадаваць іх у кантакты і яны вас — таксама. З вашага «пратэснага» акаўнта не варта перапісвацца з калегамі, сваякамі або іншымі людзьмі, якія не трымаюцца базавых правілаў інфармацыйнай бяспекі.
- Мае сэнс хаця б раз на некалькі месяцаў мяняць (выдаляць і ствараць нанова) ваш «пратэсны» акаўнт.
- Лепш ствараць акаўнты на віртуальныя нумары і падумаць пра тое, каб наладзіць Партызанскі тэлеграм.
Памятайце, што не існуе ідэальнай абароны і абсалютнай ананімнасці і бяспекі ў інтэрнэце.
Як выдаліць акаўнт у Telegram і стварыць яго нанова на віртуальны нумар — пакрокавы гайд
Таксама ў Беларусі ёсць ініцыятыва, да якай можна звярнуцца па кансультацыі наконт вашай інфармацыйнай бяспекі: СyberBeaver (бот для сувязі).
Чытайце таксама:
Я выдаліў Telegram-акаўнт. Я ў бяспецы?
Тлумачым, якім чынам сілавікі знаходзяць карыстальнікаў Telegram і як гэтага пазбегнуць