Za atakaj dronaŭ na Kreml moža stajać Ukraina — NYT
U Vašynhtonie ličać, što za atakaj bieśpiłotnikaŭ na Kreml, jakaja adbyłasia ŭ pačatku maja, moža stajać Ukraina, piša New York Times sa spasyłkaj na krynicy ŭ Biełym domie. Takija vysnovy amierykanskaja raźviedka zrabiła na asnovie pierachopaŭ paviedamleńniaŭ rasijskaha i ŭkrainskaha bakoŭ.
25.05.2023 / 10:46
Pieršapačatkova niekatoryja amierykanskija čynoŭniki razhladali ataku na Kreml jak insceniroŭku Maskvy, zaklikanuju pryvieści da eskałacyi kanfliktu. Adnak potym ZŠA pierachapili paviedamleńni, u jakich rasijskija aficyjnyja asoby abmiarkoŭvali incydent i vyniki papiaredniaha rasśledavańnia. Jak akazałasia, rasijskija ŭłady byli ździŭleny atakaj bieśpiłotnika i vinavacili ŭ tym, što adbyłosia Ukrainu, piša Bi-bi-si.
Anałahičnym čynam vyśvietliłasia, što niekatoryja ŭkrainskija čynoŭniki schilnyja ličyć ataku na Kreml spravaj ruk ich krainy, piša NYT.
Krynicy ŭ ZŠA padkreślivajuć, što vysnovy amierykanskaj raźviedki — tolki zdahadka. Dastatkovych źviestak ab dačynieńni Ukrainy niama.
Vydańnie nahadvaje, što ZŠA-najbujniejšy ŭ śviecie pastaŭščyk uzbrajeńniaŭ Ukrainie i padobnyja incydenty vielmi turbujuć administracyju Džo Bajdena. U Biełym domie aścierahajucca, što jany mohuć dać Rasii nahodu raspaŭsiudzić vajnu za miežy Ukrainy.
Zaraz ZŠA taksama vyvučajuć abstaviny ŭvarvańnia praŭkrainskich dyviersijnych hrup u Biełharadskuju vobłaść, jaki adbyŭsia na hetym tydni.
Amierykanskija čynoŭniki ličać, što heta taksama mahło być akcyjaj, spłanavanaj u Kijevie, niahledziačy na toje, što adkaznaść za jaje ŭziali na siabie dobraachvotnickija hrupoŭki.
Taksama ŭ ZŠA dapuskajuć, što Ukraina datyčnaja da zabojstva Darji Duhinaj — dački rasijskaha ideołaha vajny Alaksandra Duhina, jakuju ŭzarvali ŭ aŭtamabili ŭ žniŭni minułaha hoda, piša NYT.
Ukrainskija ŭłady aficyjna nie brali na siabie adkaznaść za hetyja ataki.
Čytajcie taksama:
Treciaha maja była sproba ŭdaru bieśpiłotnikami pa Kramli
Instytut vyvučeńnia vajny ličyć ataku dronaŭ na Kreml insceniroŭkaj i tłumačyć čamu