У Мінску вайскоўцы выставілі блакпост. Што адбываецца?
Людзі ў хакі перакрылі адну з вуліц у сталіцы.
27.05.2023 / 15:19
Менчукі даслалі ў рэдакцыю Tochka.by наступныя відэа — у мікрараёне Лошыца пасярод дарогі паставілі блакпост: бетонныя блокі і мяшкі з пяском. За імі ходзяць людзі ў вайсковай форме.
Высветлілася, што вайскоўцы перакрылі вуліцу Уладзіслава Сыракомлі, у самым яе канцы. Месца непрыкметнае, у тупіку — ля чыгуначнага прыпынку «Лошыца».
Блакпост выглядае так: мяшкі з пяском, бетонныя блокі і шлагбаум. Побач палявы лагер — намёт накрылі маскіровачнай сеткай.
Вайскоўцы расказалі, што ідзе трэніроўка войскаў тэрытарыяльнай абароны. Працягнецца яна яшчэ прыкладна тыдзень.
Тэрабарона трэніруецца па ўсёй краіне. Не толькі на зямлі, але нават на вадзе. Ваенныя зборы праходзілі 26 мая на рацэ Сож.
«Тэрытарыяльная абарона з сістэмы трансфармуецца ў паўнавартасную баявую», — заявіў міністр абароны Віктар Хрэнін на адкрыцці вайсковага збору.
Па задумцы трэніроўкі, байцы тэрытарыяльных войскаў лавілі ўмоўных дыверсантаў. Тэрабароне дапамагаў дэсант сіл спецыяльных аперацый.
Чытайце таксама:
На вучэнні тэрытарыяльнай абароны ў Навагрудскім раёне паклікалі старшыняў райвыканкамаў
Апублікаваны праект закона пра народнае апалчэнне. Расказваем, што ў ім
Хрэнін расказаў губернатарам і абласным камісарам, як правільна бараніць гарады і вёскі